FIA shpjegon pse brezi i ri i makinave të Formula 1 për vitin 2026 pritet të sjellë gara më të ngushta dhe më emocionuese. Rregullat e reja përfshijnë makina më të lehta e më të ngushta, më shumë fuqi elektrike në motorët hibridë, karburant të qëndrueshëm dhe aerodinamikë aktive.

DRS do të hiqet, duke u zëvendësuar me një sistem elektrik “manual override”, që do t’u japë makinerive që ndjekin një avantazh shpejtësie në vijat e drejta. Sipas drejtorit të FIA për njëvendëshe, Nikolas Tombazis, aerodinamika e re do t’i lejojë makinat të ndjekin njëra-tjetrën shumë më afër se tani.

Ai thotë se mësimet nga rregullat e vitit 2022 janë përdorur për të përmirësuar ndjeshëm rrjedhën e ajrit pas makinës. Në 2026, humbja e forcës së poshtme pritet të jetë më e ulëta që ka qenë ndonjëherë, duke krijuar kushte më të mira për duele dhe parakalime.

Një faktor tjetër që mund të sjellë ndryshime mes makinave është mënyra se si pilotët menaxhojnë energjinë elektrike – dy motorë identikë mund të kenë performancë të ndryshme vetëm për shkak të përdorimit të energjisë në xhiro.

Red Bull beson se kjo do ta bëjë garën më të paparashikueshme, sidomos me makinat, elektronikën dhe teknologjitë krejt të reja: “Do të shohim nëse të gjithë do t’i çojnë makinat deri në fund. Për momentin, gjithçka është e paparashikueshme”.