FIA dhe Formula 1 kanë vendosur një kufizim maksimal prej 25 xhiros pa ndërruar gomat për arsye sigurie, të cilin skuadrat do të duhet ta respektojnë në garën e parafundit të kampionatit botëror më 30 nëntor, në Çmimin e Madh të Katarit në pistën Lusail.

Vendimi u publikua zyrtarisht nga prodhuesi italian i gomave për F1, Pirelli.

Në deklaratën për media, ata shkruan se në një set gomash do të lejohen maksimumi 25 xhiro, sepse pas provave të gjata në pistën Lusail nuk ishte e garantuar që goma të mos plaste në shpejtësi maksimale, gjë që mund të ishte fatale për pilotin.

Pista e Lusail-it është e njohur për ngarkesat e mëdha që u shkakton gomave, pjesërisht për shkak të temperaturave të larta të ajrit dhe asfaltit.

Dy vite më parë, konsumimi i gomave ishte kufizuar në 18 xhiro, gjë që kërkonte të paktën tre ndalesa në bokse gjatë garës prej 57 xhirosh. Këtë vit, pilotët do të duhet të ndërrrojnë gomat të paktën dy herë.

“Kjo masë u konsiderua e nevojshme pas analizës së gomave të përdorura në sezonin 2024”, thanë nga Pirelli. “Vitin e kaluar disa goma, veçanërisht goma e majtë e përparme, arritën nivelin maksimal të konsumimit”, shpjegoi prodhuesi.

Çmimit të Madh të Katarit i paraprin Çmimi i Madh i Las Vegasit në Shtetet e Bashkuara, të dielën më 23 nëntor.

Sezoni do të përfundojë me Çmimin e Madh të Abu Dhabit më 7 dhjetor.

Tri gara para fundit, britaniku Lando Norris nga McLaren kryeson renditjen e përgjithshme me 390 pikë. Shoku i tij i skuadrës, australiani Oscar Piastri, është në vend të dytë, 24 pikë prapa.

Kampioni i katërfishtë i botës, Max Verstappen nga Red Bull, renditet i treti, 49 pikë prapa Norrisit.