Me një linjë të dallueshme çatie që të kujton modelin origjinal FX, Infiniti ka zbuluar konceptin QX65 Monograph, si një pasardhës shpirtëror të SUV-it që dikur shënoi kulmin e suksesit të markës.

FX, i prezantuar për herë të parë në vitin 2003 dhe ndërtuar mbi platformën me rrota të pasme të Nissan, ishte një crossover me dizajn sportiv dhe dinamikë drejtimi të shkëlqyer, shumë përpara kohës së tij.

Që nga ajo kohë, Infiniti nuk ka arritur të krijojë një model po aq të rëndësishëm. Tani, kompania po përpiqet të rikthejë atë lavdi me QX65, shkruan Motor1, transmeton AutoPortali.

Koncepti u prezantua sot në “The Quail” në Monterey dhe, veçanërisht në profil, ngjason me FX-në falë vijës karakteristike të çatisë. Megjithatë, duke qenë i bazuar mbi crossover-in me motor tërthor QX60 me tre rreshta, QX65 nuk ka të njëjtat përmasa të zhvendosura drejt pjesës së pasme të kabinës.

Dizajn modern dhe agresiv

QX65 sjell elemente bashkëkohore të dizajnit, si grila e madhe me shufra vertikale e ngjashme me modelet e fundit QX60 dhe QX80, si dhe dritat LED që shtrihen në gjithë gjerësinë e pjesës së përparme dhe të pasme.

Infiniti ka ndjekur trendin e përdorimit të dritave ditore (DRL) si “sytë” e makinës, ndërsa fenerët kryesorë janë të fshehur më poshtë, në një element të errësuar të fasadës.

Modeli vjen me rrota 22-inç dhe një ngjyrë mat vjollcë të quajtur “Twilight”. Ndryshe nga QX60 me tre rreshta, çatia e pjerrët e QX65 kufizon hapësirën në dy rreshta, duke e pozicionuar atë si rival të Audi Q8, BMW X6 dhe Mercedes-Benz GLE Coupe.

Infiniti nuk ka konfirmuar ende nëse QX65 do të hyjë në prodhim, por pamja e tij sugjeron më shumë se një koncept fantastik. Siç deklaron kompania: “Qëndroni në pritje për ta parë të jashtëzakonshmen të bëhet realitet në muajt në vijim”.  /AutoPortali