Qyteti i Centerville në Shtetet e Bashkuara të Amerikës ka nisur një projekt të ri novator, duke përfshirë inteligjencën artificiale në menaxhimin e mbeturinave. Kamionë të rinj mbeturinash, të pajisur me kamera dhe softuer të avancuar, tashmë po skanojnë kazanët e plehrave të qytetarëve për të zbuluar ndarjen e gabuar të mbeturinave dhe sendet e papërshtatshme për riciklim.

Sipas autoriteteve lokale, teknologjia ka për qëllim të ndalojë atë që quhet “mashtrim me mbeturinat” dhe të përmirësojë ndjeshëm cilësinë e sistemit të riciklimit të qytetit. Kamera të vendosura në pjesën e pasme të kamionëve kapin pamjet e përmbajtjes së kontejnerëve në momentin e zbrasjes, ndërsa algoritmet e inteligjencës artificiale analizojnë në kohë reale ato që shihen për të identifikuar artikujt që nuk përputhen me kategorinë përkatëse, shkruan The Driver, transmeton AutoPortali.

Nëse konstatohet një shkelje, një letër paralajmëruese dërgohet automatikisht në adresën e banorit përkatës. Letra përmban detaje mbi gabimin dhe udhëzime se si të menaxhohen mbeturinat në mënyrë korrekte në të ardhmen.

“Teknologjia na lejon të identifikojmë më saktë zonat problematike në qytet,” tha Wayne Davis, menaxher shtetëror në Centerville. “Zvogëlimi i ndotjes në sistemin tonë të riciklimit jo vetëm që ndihmon mjedisin, por edhe ul ndjeshëm kostot e përpunimit.”, tha tutje ai.

Megjithëse projekti tashmë ka hyrë në fazën e zbatimit, autoritetet ende nuk kanë bërë të ditur nëse qytetarët do të gjobiten për shkeljet e vazhdueshme të ndarjes së mbeturinave.

Qyteti i Centerville është ndër të parët në SHBA që aplikon këtë lloj teknologjie në përmasë të gjerë, dhe autoritetet shpresojnë që modeli i tyre të shërbejë si shembull për komunitete të tjera në të ardhmen.