Pietermaritzburg dhe Pretoria në Afrikën e Jugut, Caracas në Venezuelë dhe Port Moresby në Papua Guinea e Re janë renditur si qytetet më të pasigurta në botë sipas Indeksit të Krimit të Numbeo-s për mesin e vitit 2025. Ky raport bazohet në perceptimet e banorëve mbi sigurinë dhe krimin, duke nxjerrë në pah kontraste të forta midis qendrave urbane në nivel global.
Indeksi i Numbeo-s sipas EconomicTimes, përpilon të dhëna të dërguara nga vetë qytetarët, që lidhen me nivelin e krimit, ndjesinë e sigurisë gjatë natës, frikën nga grabitjet dhe reagimin e forcave të rendit, transmeton AutoPortali.
Qytetet me indeks më të ulët sigurie zakonisht shfaqin frikë më të madhe nga krimet, përfshirë edhe ato të dhunshme apo me karakter pronësor. Renditja për mesin e vitit 2025 ofron një pasqyrë të qartë të perceptimeve urbane mbi krimin.
Ku renditen qytetet indiane?
Ndër qytetet indiane, Mangaluru qëndron më lart në listë, duke u renditur në vendin e 48-të në rang global me një indeks sigurie prej 74.2, duke lënë pas disa qytete evropiane dhe amerikane. Edhe qytete si Vadodara (vendi 85, indeksi 69.2), Ahmedabad (vendi 93, 68.2), Surat (106, 66.6) dhe Jaipur (117, 65.2) renditen në mesin e qyteteve me perceptime relativisht të mira për sigurinë.
Megjithatë, qytetet e tjera të mëdha të Indisë qëndrojnë dukshëm më poshtë në renditje. Thiruvananthapuram renditet në vendin e 148-të (61.1), Chennai në 157 (60.3), Pune në 166 (58.7), dhe Chandigarh në 175 (57.4). Hyderabad gjendet në vendin e 176 (57.3), ndërsa Mumbai në 186 me një indeks prej 55.9.
Kryeqyteti New Delhi është ndër më të fundit në listë, në vendin e 314-të, me një indeks sigurie prej vetëm 40.9. Po ashtu, qytetet e rajonit NCR si Ghaziabad (311, 41.6), Noida (284, 44.9) dhe Gurgaon (275, 46.0) paraqiten dobët, duke reflektuar shqetësime të mëdha për sigurinë publike.
10 qytetet më të pasigurta në botë për vitin 2025:
Qytetet kryesore të Afrikës së Jugut dominojnë fundin e listës.
Pietermaritzburg në Afrikën e Jugut zë vendin e fundit me një indeks sigurie prej vetëm 17.3. Pas saj vjen Pretoria me 18.2, ndërsa Caracas (Venezuelë) dhe Port Moresby (Papua Guinea e Re) ndajnë të njëjtin indeks prej 18.6. Të dhënat pasqyrojnë një ndjenjë të thellë pasigurie mes banorëve për shkak të krimeve, dhunës së bandave dhe pranisë së dobët të forcave të rendit.
Në mesin e 10 qyteteve më të pasigurta, katër janë nga Afrika e Jugut: përveç dy të parave, edhe Durban (19.5), Johannesburg (19.2) dhe Port Elizabeth (21.7) përballen me sfida serioze në menaxhimin e rendit dhe sigurisë.
Qytetet e Amerikës Latine dhe SHBA-ve me rezultate të ulëta në siguri
Në Amerikën Latine, përveç Caracas, edhe qytetet Rio de Janeiro (24.8), Salvador (23.3) dhe San Pedro Sula në Honduras (20.6) vazhdojnë të përballen me nivele të larta kriminaliteti. San Pedro Sula, dikur ndër qytetet më të dhunshme në botë, vazhdon të perceptohet si shumë e pasigurt për jetesë.
Në Shtetet e Bashkuara, qytetet Memphis (21.6), Baltimore (27.6) dhe Detroit (27.0) janë në fund të listës përsa i përket sigurisë. Këto qytete përballen me dhunë me armë zjarri, vjedhje dhe krime të lidhura me drogën. Aktiviteti i bandave dhe krimet e vogla janë gjithashtu shqetësime të shpeshta.
Në fund të indeksit renditen edhe qytete si Recife, Fortaleza dhe Guayaquil, duke përforcuar alarmin mbi pasigurinë në disa rajone të Amerikës Latine dhe Afrikës Subsahariane.
Abu Dhabi, qyteti më i sigurt në botë
Në anën tjetër të spektrit, qytete si Abu Dhabi, Taipei dhe Doha vazhdojnë të renditen ndër më të sigurtat në botë, falë nivelit të ulët të krimit dhe standardeve të larta të sigurisë publike. Banorët e këtyre qyteteve raportojnë pak ose aspak raste të dhunës dhe shprehin besim të lartë në policinë dhe institucionet shtetërore. /AutoPortali
