Ditët e këqija kanë përfunduar. Armando Broja ka nisur numërimin mbrapsht deri në debutimin e tij me Evertonin në Premier League. Sulmuesi kuqezi ka nisur prej dy javësh të stërvitet me pjesën tjetër të ekipit, pas dëmtimit të rëndë në tendinën e akilit.

Por, sipas mediave angleze, rikthimi në aksion i Brojës është vetëm çështje ditësh. Sipas këtyre raportimeve, këtë fundjavë futbollisti do të luajë me skuadrën U21. Kjo do të jetë prova gjenerale dhe do të vendosë nëse ai do të jetë i gatshëm për sfidën e fundjavës së ardhshme në kampionatin anglez.

Një lajm i mirë për Brojën, që u transferua nga Chelsea te Everton në orët e fundit të afatit kalimtar të verës në formë huazimi me të drejtë blerje.

Në lidhje me këtë marrëveshje, mediat angleze kanë zbuluar edhe detaje që nuk kishin dalë në dritë më parë.

Everton nuk ka paguar asnjë paund për formulën e huazimit dhe do të nisë ta bëjë këtë vetëm pasi Armando Broja të bëjë debutimin. Për momentin, klubi paguan vetëm pagën prej 78 mijë paund në javë për futbollistin shqiptar. Ky i fundit shihet si një investim për të ardhmen në “Goodison Park” dhe Everton pritet të blejë në fund të sezonit kartonin e 23 vjeçarit për 30 milion paund.