Në kushte garash, rekordi i tyre është 1.82 sekonda, arritur në pistën Interlagos, ku këtë fundjavë zhvillohet gara e 21-të e kampionatit. Për kujtesë, sprinti zhvillohet të shtunën në orën 15:00 (sipas orës qendrore evropiane), ndërsa Çmimi i Madh i Sao Paulos të dielën në orën 18:00.

Këtë e tregoi Jack Harrington nga Red Bull Racing gjatë konferencës Digital Trends 2025. Ai ndau me fansat mënyrën se si përdoren teknologjitë e avancuara në Formula 1, menaxhimin e sasisë gjigante të të dhënave, krijimin e makinave dhe përdorimin e inteligjencës artificiale në kampionatin botëror. Por, së pari, ai tregoi historinë e ndërrimit të gomave në errësirë të plotë.

Rekordi në pistë: 1.82 sekonda në Brazil, viti 2019

“Ekipi ynë mban rekordin për ndërrimin më të shpejtë të gomave në Formulën 1, katër goma për 1.82 sekonda! Ju sfidoj të zhbllokoni telefonin tuaj për 1.82 sekonda! Por, ne menduam se kjo ishte shumë e lehtë për mekanikët tanë, prandaj i sfiduam ta bëjnë këtë në errësirë të plotë.

Kam qenë në dhomë me ta kur e bënë, ishte aq errësirë sa nuk shihja dorën përpara fytyrës. Vetëm dy mekanikë kishin syze për shikim nate, ata që ngrinin pjesën e përparme dhe të pasme të makinës. Ishte shumë e rrezikshme të drejtoje një makinë Formula 1 drejt dikujt që nuk sheh asgjë përpara. Të gjithë të tjerët punuan në errësirë totale. Pas disa provash, arritën të kryenin një ndalesë për 2.64 sekonda, pa parë asgjë, vetëm falë kujtesës së jashtëzakonshme dhe punës së ekipit”, shpjegoi Harrington.