Në një kohë kur tregu i kabrioletëve është në rënie, Mini spikat si një nga të paktët prodhues që vijon të investojë seriozisht në këtë segment. Për vitin 2025, i gjithë gama e Mini është rinovuar, përfshirë edhe versionin sportiv John Cooper Works dhe dy modele të tjera me tavan të hapur.
Në një botë ku teknologjia e re dhe prakticiteti po i zëvendësojnë emocionet klasike të vozitjes, Mini vazhdon të mbetet sinonim i lirisë nën qiell të hapur. Dhe për entuziastët e kabrioletëve, ky është momenti i duhur për t’u rikthyer pas timonit.
Kabrioleti që nuk dorëzohet
Sipas AutoWeek, Mini aktualisht ofron vetëm dy linja modelesh në SHBA, Cooper dhe Countryman dhe kabrioletët përbëjnë rreth 12% të shitjeve në këtë treg, transmeton AutoPortali.
Ndërkohë që shumë marka të mëdha janë tërhequr nga prodhimi i kabrioletëve (përfshirë Fiat 500e, VW Beetle dhe Chevy Camaro), Mini mbetet i përkushtuar.
Në një epokë ku transmisionet manuale, stacionet “wagon”, karburatorët dhe disqet CD janë zhdukur, kabrioleti mund të jetë në prag të të njëjtit fat por Mini refuzon të dorëzohet.
Plotësisht i rinovuar për 2025
Modelet e reja Mini për vitin 2025 janë ndërtuar nga e para, përfshirë versionet me tavan të hapur. Modelet F67 zëvendësojnë ato të mëparshmet F57, me të gjitha që transmetojnë fuqinë në rrotat e përparme përmes një transmisioni të ri me dy kapje dhe shtatë marshe.
Me peshë nën 1,450 kg, Mini kabriolet mbetet i lehtë, i shpejtë dhe argëtues në drejtim. Për më tepër, tavanin e butë mund ta hapësh plotësisht për vetëm 18 sekonda, edhe në lëvizje deri në 30 km/h. Për mbrojtje nga dielli, pjesa e përparme mund të hapet si një “sunroof” deri në 40 cm, në çdo shpejtësi.
Shtesa në çmim për versionin kabriolet, krahasuar me modelin Cooper me dy dyer, është rreth 5,000 dollarë.
Opsionet që ke në dispozicion:
Mini Cooper Convertible: Motori 2.0 turbo me 161 kuaj fuqi dhe 250 Nm. Arrin nga 0 në 100 km/h për 7.9 sekonda. Çmimi fillon nga 34,945 USD në versionin Signature ose 37,345 USD në Signature Plus. Për krahasim, një Ford Mustang kabriolet fillon nga 40,000 USD.
Mini Cooper S Convertible: Po i njëjti motor, por me 201 kuaj fuqi dhe 300 Nm. Sprinti nga 0 në 100 km/h në 6.7 sekonda. Fillon nga 38,195 USD në Signature ose 40,595 USD në Signature Plus.
John Cooper Works Convertible (JCW): Versioni më i fuqishëm me 228 kuaj fuqi dhe 380 Nm. Arrin 0–100 km/h në 6.2 sekonda. Çmimi: nga 44,695 USD në Signature ose 47,095 USD në Signature Plus.
