Trafiku Urban në Prishtinë ka paralajmëruar se nga java e ardhshme shërbimi i transportit publik mund të ndërpritet plotësisht, për shkak të vështirësive të rënda financiare të krijuara nga bllokimi i mjeteve buxhetore.
Në reagim thuhet se kjo situatë ka ardhur pasi Qeveria e Kosovës, përkatësisht Ministria e Financave, nuk ka lëshuar mjetet e nevojshme, çka ka pamundësuar Komunën e Prishtinës të shlyejë detyrimet ndaj ndërmarrjes, përcjell AutoPortali.
“Trafiku Urban” kërkon zgjidhje të menjëhershme të bllokimit financiar për të mos ndërprerë shërbimin ndaj rreth 60 mijë qytetarëve që udhëtojnë çdo ditë.
Njoftimi i plotë:
Të nderuar qytetarë,
N.P.K. “Trafiku Urban” SH.A. njofton se ofrimi i shërbimit të transportit publik rrezikon të pezullohet plotësisht nga java e ardhshme, për shkak të pamundësisë financiare të shkaktuar nga bllokimi i mjeteve buxhetore.
Kjo situatë ka ardhur si rezultat i moslëshimit të mjeteve nga Qeveria e Kosovës, përkatësisht Ministria e Financave, çka ka pamundësuar Komunën e Prishtinës të shlyejë detyrimet ndaj ndërmarrjes. Si rrjedhojë, “Trafiku Urban” po përballet me vështirësi të theksuara financiare, duke cenuar funksionimin operativ dhe aftësinë për të vazhduar ofrimin e shërbimit për qytetarët.
Pavarësisht bilancit pozitiv dhe performancës së qëndrueshme të ndërmarrjes, vonesat në pagesa që nga muaji korrik kanë prekur furnitorët, partnerët bashkëpunues dhe proceset e brendshme teknike, duke krijuar rrethana që e bëjnë të pamundur operimin e rregullt.
“Trafiku Urban” mbetet i përkushtuar ndaj shërbimit publik dhe apelon për zgjidhje të menjëherëshme të bllokimit financiar, në mënyrë që të shmanget ndërprerja e qarkullimit për rreth 60 mijë qytetarë që përdorin transportin çdo ditë.
