Në paddock-un e Formula 1 po qarkullojnë prej muajsh thashetheme se motori i ri i Red Bull-it, i zhvilluar brenda ekipit, është prapa konkurencës, ndërsa Mercedes thuhet se është më i përgatituri për rregullat e reja të vitit 2026.

Red Bull ndërtoi divizionin e vet të motorëve pesë vite më parë, por projekti mbetet shumë ambicioz, pavarësisht ndihmës nga Ford dhe rekrutimit të ekspertëve nga Mercedes. Sidoqoftë, këshilltari Helmut Marko beson se përparësia e vërtetë e ekipit është Max Verstappen.

“Piloti duhet të dijë të menaxhojë fuqinë elektrike dhe ka vetëm një që mund të ecë shpejt dhe të mendojë njëkohësisht. Ajo është përparësia jonë,” tha Marko, duke iu referuar qartësisht Verstappenit.

Rregullat e 2026-s sjellin makina shumë më komplekse,  aerodinamikë aktive, më shumë fuqi elektrike dhe një “modalitet përshpejtimi” që zëvendëson DRS-in. Kjo do të kërkojë pilotë që dinë të menaxhojnë energjinë dhe balancën aerodinamike në çdo xhiro.

Shefi i inxhinierisë së Red Bull, Paul Monaghan, pranoi se projekti është “jashtëzakonisht i ndërlikuar”, por ekipi po përpiqet të jetë gati për testet e para në Barcelonë në fund të janarit.

“Do të kemi një makinë të mirë, një motor të mirë dhe pilotë të jashtëzakonshëm. Le të shohim si do të shkojë”, tha ai.