Vetëm pesë pilotë kanë mbetur me shanse matematikore për të fituar titullin këtë sezon në Formula 1.

Gjashtë gara të mbetura deri në fund, dyshja e McLaren-it, Oscar Piastri dhe Lando Norris, si dhe George Russell, Charles Leclerc dhe Max Verstappen janë të vetmit pilotë që nuk kanë dalë nga gara për titull.

Para garës në Shtetet e Bashkuara të Amerikës, prin Piastri me 336 pikë, pra 22 më shumë se shoku i tij i skuadrës.

Pasojnë Verstappen me 273 pikë, Russell me 237 dhe Leclerc me 173. Pra, situata është mjaft e qartë sa i përket atyre që kanë shanse reale, dhe jo vetëm matematikore, për kënaqësinë e të gjithëve në kampin e prodhuesit britanik.

Gara e ardhshme e kampionatit të F1 do të zhvillohet në Austin më 19 tetor.

Pas kësaj, na presin garat për Çmimet e Mëdha të Meksikës, Brazilit, një tjetër në SHBA (Las Vegas), Katarit dhe më në fund ajo e Abu Dhabit më 7 dhjetor.