Gjatë dy javëve të para të vitit 2026, Policia e Kosovës ka shqiptuar gjithsej 1.883 gjoba për kundërvajtje të ndryshme në trafik në rajonin e Prishtinës, në kuadër të angazhimeve për rritjen e sigurisë rrugore.

Sipas njoftimit zyrtar të Policisë, një nga shkeljet më të shpeshta vazhdon të mbetet tejkalimi i shpejtësisë, veçanërisht në kushtet e sezonit dimëror, ku rreziqet në trafik janë më të theksuara. Po ashtu, shqetësues mbetet edhe numri i automjeteve të paregjistruara që qarkullojnë në rrugë.

Gjatë kësaj periudhe, Policia ka evidentuar 353 automjete që kanë qarkulluar pa regjistrim dhe pa kontroll teknik, duke përbërë një rrezik serioz për sigurinë e pjesëmarrësve në trafik.

Njësiti Rajonal i Trafikut Rrugor, nga data 1 janar deri më 14 janar 2026, ka qenë i angazhuar në zbatimin e planit operativ “Sezoni Dimëror”.

Për shkak të kushteve të vështira atmosferike, zyrtarët policorë, në koordinim me përfaqësues të ministrisë përkatëse dhe kompanitë e mirëmbajtjes së rrugëve, janë angazhuar në rregullimin dhe menaxhimin e trafikut, veçanërisht në zonat ku qarkullimi ka qenë i vështirësuar.

Paralelisht me këto angazhime, Policia ka intensifikuar edhe aktivitetet për rritjen e sigurisë në trafik. Vetëm gjatë dy javëve të para të këtij viti, në rajonin e Prishtinës janë shqiptuar 1.883 gjoba për kundërvajtje të ndryshme.

Përveç tejkalimit të shpejtësisë, Policia vlerëson se një tjetër sfidë mbetet numri i madh i automjeteve të paregjistruara, të cilat qarkullojnë pa u nënshtruar kontrollit teknik, duke paraqitur rrezik të drejtpërdrejtë për sigurinë rrugore.

Policia u ka bërë thirrje të gjithë drejtuesve të automjeteve që të respektojnë rregullat dhe shenjat e trafikut, duke paralajmëruar se Njësiti Rajonal i Trafikut Rrugor në Prishtinë do të vazhdojë me aktivitetet policore për të garantuar mbarëvajtjen dhe sigurinë në rrugë./AutoPortali