Kryeministri Edi Rama ka dhënë sot lajmin për nisjen e fazës së asfaltimit të rrugës lidhëse mes Urës së Bilçës dhe Drobonikut, një projekt që ai e cilëson si më shumë se infrastrukturë, një rrugë drejt zhvillimit rural, bujqësor dhe turistik.

Përmes një postimi në rrjetet sociale, i shoqëruar me pamje nga terreni, Rama theksoi rëndësinë strategjike të këtij segmenti, i cili do të lehtësojë aksesin për banorët e fshatrave përreth, do të mbështesë prodhimin bujqësor dhe do të përmirësojë ndjeshëm lidhjen e jugut me qytetin e Beratit.

“Nuk është thjesht një rrugë në hartë, por një urë zhvillimi,” shkruan Rama, duke e përshkruar këtë ndërhyrje si një hap konkret për të rritur fluksin turistik dhe për të ndihmuar komunitetet lokale.

Projekti pritet të përmirësojë ndjeshëm lëvizshmërinë në zonë, e cila ka vuajtur prej kohësh nga mungesa e infrastrukturës moderne. Punimet për asfaltimin janë në fazën përfundimtare dhe sinjalizojnë përmbylljen e një pritjeje të gjatë për banorët vendas./AutoPortali