Fabio Quartararo beson se Yamaha do të përdorë motorin e ri V4 gjatë gjithë sezonit të MotoGP 2026, pavarësisht mungesës së shpejtësisë që ka treguar prototipi në testet e fundit.

Yamaha po zhvillon paralelisht V4-n, ndërsa aktualisht garon ende me motorin me katër cilindra në rresht. Testuesi Augusto Fernandez e ka provuar motorin e ri në Misano dhe Sepang, por rezultatet kanë qenë zhgënjyese.

Edhe pse Yamaha nuk e ka zyrtarizuar ende vendimin, Quartararo tha se është pothuajse e sigurt se do të përdoret V4.

“Për sa kuptoj unë, po, 99 për qind po”, tha kampioni i botës 2021.

Ai shtoi se Yamaha nuk do të ndajë përpjekjet mes dy motorëve, përveç nëse V4 tregohet më i dobët se versioni aktual, por theksoi:

“Nga sa kuptoj, do të garojmë me V4”.

Quartararo do ta testojë vetë motorin menjëherë pas finales në Valencia, një provë vendimtare për të ardhmen e tij me Yamaha-n. Ai tha se ka folur me Fernandez dhe madje i ka dhënë atij një pjesë nga motori i tij për ta testuar, por shtoi se “tani është detyrë e inxhinierëve të kuptojnë çfarë duhet bërë për të mbyllur hendekun”.