Në fund të karrierës së tij në Formula 1, Michael Schumacher mbante shumë rekorde. Megjithatë, disa prej tyre janë thyer ose të paktën barazuar, falë Lewis Hamilton dhe Max Verstappen, të cilët kanë fituar së bashku 11 tituj!

Gjermani, megjithatë, mban një rekord që sigurisht nuk do të thyhet kurrë, por mund të barazohet. Bëhet fjalë për arritjen e tij në sezonin 2002, kur ai u ngjit në podium në çdo garë, duke arritur një rekord të përsosur. Atëherë kalendari përfshinte 17 gara dhe në secilën “Schumi” u ngjit në podiumin e fituesve. Në këto 17 startime, ai arriti 11 fitore, 5 vendet e dyta dhe vetëm një vend të tretë.

Titullin e kampionit të botës e siguroi që në Francë, gjashtë gara para përfundimit të sezonit.

Në vendin më të afërt me arritjen e Schumacher është afruar Max Verstappen, i cili në sezonin e tij ultra-dominues 2023 regjistroi 21 podiume në 22 gara (95.45%). Holandezi nuk ishte në mesin e tre të parëve vetëm në Garën e Madhe të Singaporit, ku përfundoi i pesti në garën e vetme që Red Bull nuk e fitoi gjatë vitit 2023. Në vendin e tretë, me një sukses prej 90%, është Jim Clark, i cili në vitin 1963 u ngjit në podium në nëntë nga dhjetë gara.