Rimorkimi shpesh shihet si i ndërlikuar dhe i rrezikshëm, por shumë nga frikërat lidhen me mite që nuk qëndrojnë. Nga makina elektrike e deri te nevoja për patentë speciale, ekzistojnë keqkuptime që i mbajnë shoferët larg.

Ja cilat janë pesë mitet më të zakonshme dhe e vërteta pas tyre sipas AutoBlog.

5. Makina elektrike nuk mund të rimorkojnë, e gabuar

Edhe pse disa makina elektrike nuk janë të certifikuara për rimorkim, shumë të tjera janë. Secila ka kapacitetin e vet të rimorkimit të përcaktuar nga prodhuesi. Për shembull, Hyundai Kona EV ka kapacitet prej 1,500 lbs, ndërsa Chevrolet Silverado EV mund të tërheqë mbi 12,000 lbs kur është e pajisur si duhet. Duhet mbajtur parasysh se rimorkimi përgjysmon autonominë e baterisë, transmeton AutoPortali.

4. Rimorkimi e prish makinën, e gabuar

Nëse mjeti është në gjendje të mirë dhe nuk tejkalon kufijtë e prodhuesit, rimorkimi i herëpashershëm nuk është problem. Kushtet bazë, mbajeni ngarkesën brenda kufijve të peshës, përdorni pajisjet e duhura dhe shpërndani ngarkesën si duhet. Ngasja e qetë, shmangia e frenimeve të forta dhe ritmi i qëndrueshëm ndihmojnë dukshëm.

3. Duhet patentë speciale për rimorkim, e gabuar

Përveç rasteve të ngarkesave komerciale, shumica e rimorkimeve lejohen me patentën e zakonshme. Rregullat ndryshojnë nga shteti në shtet (në SHBA), por përgjithësisht nuk kërkohet CDL nëse pesha e kombinuar e automjetit dhe rimorkios nuk i kalon 26,001 lbs. Administratat për automjete ofrojnë udhëzime të qarta për çdo rast.

2. Rimorkimi bëhet vetëm me furgon ose SUV, e gabuar

Është e vërtetë që një kornizë e fortë (frame) e bën më të lehtë tërheqjen e rimorkiove të mëdha, por kjo nuk është gjithmonë e domosdoshme. Shumë makina moderne me trup unibody kanë kapacitet të konsiderueshëm rimorkimi. Megjithatë, përdorimi i një automjeti me kornizë të fortë ofron më pak dridhje dhe kontroll më të mirë, ndaj preferohet për rimorkime më të rënda.

1. Duhet trajnim para rimorkimit për herë të parë, pjesërisht e vërtetë

Ligjërisht, nuk kërkohet kurs ose certifikatë për rimorkimin bazë. Megjithatë, këshillohet fuqimisht të shikoni video ose materiale trajnimi mbi sigurinë. Kompania U-Haul, një nga më të mëdhatë për qira rimorkiosh në SHBA, ofron video të posaçme mbi lidhjen e rimorkios, ngarkimin dhe sigurinë gjatë drejtimit. Edhe disa ushtrime praktike në një parking bosh, me dikë që ka përvojë, mund të jenë të vlefshme madje edhe për rimorkime të vogla.

Përfundimi

Rimorkimi nuk është aq i komplikuar sa duket, për sa kohë përgatitesh si duhet. Respektoni kufijtë e mjetit dhe rimorkios, sigurohuni për sistemet e frenimit, shtoni pasqyra shtesë nëse është e nevojshme dhe mos e tejkaloni shpejtësinë. Me pak kërkim dhe kujdes, rimorkimi bëhet një aftësi e dobishme si për nevojë praktike, ashtu edhe për aventurë. /AutoPortali