Për shumë pasagjerë, fluturimi është një rast ideal për t’u relaksuar me një film të mirë. Por psikologët thonë se jo çdo lloj filmi është i përshtatshëm për t’u parë në ajër sidomos për ata që kanë frikë nga fluturimi.

Sipas një studimi të publikuar nga Travel Republic, ndër filmat më të shikuar në avion janë ata të zhanrit horror. Por psikologu Rod Mitchell e quan këtë zgjedhje “të rrezikshme”, sidomos për personat që ndihen të tensionuar në fluturime, shkruan Nypost, transmeton AutoPortali.

“Të shikosh filma horror në avion është njësoj si të pish ekspres gjatë një testi stresi,” thotë Mitchell. “Filmat për katastrofa, veçanërisht ato që përfshijnë avionë ose hapësira të mbyllura, aktivizojnë neuronet pasqyrë, duke bërë që trupi të përjetojë rrezikun sikur të ishte real.”

Edhe dramat e rënda emocionale, të cilat zakonisht konsiderohen të përshtatshme për fluturime të gjata për shkak të tregimeve të thella, mund të ndikojnë negativisht në pasagjerët më të ndjeshëm.

“Lart në qiell, kur je i lodhur dhe i mbyllur në një vend të vogël, mbrojtjet emocionale janë më të ulëta,” shpjegon Mitchell. “Dramat e forta mund të të godasin shumë më ndryshe. Lëri filmat që të bëjnë të qash për më vonë pasi të kesh zbritur.”

Për pasagjerët nervozë, Mitchell sugjeron një alternativë krejtësisht tjetër: filmat e animuar për fëmijë. “Ato ofrojnë një përzierje nostalgjie, tregimi emocional të thjeshtë dhe arratisje të lehtë,” tha ai.

Sipas tij, filmi ideal për qetësim është ai që tashmë e keni parë një film i njohur që i jep sistemit nervor sinjalin për t’u çlodhur.

Në raportin e njëjtë, Mitchell dha edhe disa këshilla për ata që përballen me lodhjen nga ndryshimi i orarit (jet lag). Ai rekomandon:

Filmat aksion, të cilët lëshojnë doza të vogla adrenaline që ndihmojnë kundër përgjumjes.

Komeditë e shpejta, që mbajnë trurin të angazhuar përmes batutave të shpejta.

Dokumentarët interesantë, që nxisin kuriozitetin dhe e mbajnë vëmendjen zgjuar.

Ndërsa për ata që duan të flenë gjatë fluturimit, Mitchell sugjeron të zgjedhin drama të ngadalta historike apo dokumentarë për natyrën me narracion të butë, të cilët ndihmojnë trupin të qetësohet dhe të bjerë në gjumë. /AutoPortali