Për Audin, viti 2026 shënon debutimin në Formula 1, por lidhja e markës gjermane me këtë sport nis shumë më herët, falë partneritetit me legjendën Ayrton Senna. Në fillim të viteve ’90, kampioni i trefishtë i botës luajti një rol kyç në hyrjen e Audi-t në tregun brazilian.

Pas uljes së tarifave doganore në Brazil, Senna, së bashku me vëllain Leonardo Senna dhe mikun e familjes Ubirajara Guimaraes, themeloi kompaninë Senna Imports, e cila në vitin 1993 u bë importuesi zyrtar i Audi-t. Vetë Senna testoi Audi S4 në pistën Interlagos për revistën Quatro Rodas, vetëm disa javë para aksidentit fatal në Imola.

Pavarësisht humbjes së Senna-s më 1 maj 1994, partneriteti rezultoi shumë i suksesshëm: Audi tejkaloi ndjeshëm parashikimet e shitjeve dhe brenda pak vitesh u bë lider i segmentit premium në Brazil. Bashkëpunimi përfundoi në vitin 2005, pasi Audi mori nën kontroll të plotë aktivitetet e saj në vend.