Turqia ka pritur 28.4 milionë turistë të huaj nga janari deri në korrik të këtij viti, sipas të dhënave të publikuara nga Ministria e Kulturës dhe Turizmit, çka përbën një rënie prej 2.1% krahasuar me të njëjtën periudhë të vitit të kaluar. Megjithatë, të ardhurat nga turizmi kanë shënuar rritje.

Sipas Hispanatolia, duke përfshirë edhe shtetasit turq që jetojnë jashtë vendit, numri i përgjithshëm i vizitorëve ka arritur në 33.36 milionë, por sërish larg objektivit të qeverisë për këtë vit: 65 milionë vizitorë dhe 60 miliardë dollarë të ardhura nga turizmi.

Në gjashtëmujorin e parë, të ardhurat nga turizmi u rritën me 7.6% krahasuar me një vit më parë, duke arritur në 25.8 miliardë dollarë.

Ekspertët e industrisë e lidhin këtë me faktin që turistët po shpenzojnë më shumë, pasi mesatarisht një vizitor harxhoi 996 dollarë, nga 942 dollarë sa ishte vitin e kaluar.

Sa i përket tregjeve kryesore, në periudhën janar–korrik Turqia priti 3.56 milionë rusë (12.56% e totalit), megjithëse pak më pak se vitin e kaluar. Pas tyre renditen gjermanët me 3.4 milionë vizitorë dhe britanikët me 2.35 milionë.

Ndërkohë, vizitat nga Irani dhe Bullgaria pësuan rënie përkatësisht me 8% dhe 9%, duke zbritur në 1.6 milionë dhe 1.48 milionë turistë.

Stambolli dhe Antalia, destinacionet më të vizituara

Stambolli kryeson si destinacioni më i vizituar, me 10.51 milionë turistë (37.1% e totalit). Antalia renditet e dyta me 8.4 milionë vizitorë (29.5%), falë resorteve luksoze dhe plazheve të njohura.

Në vend të tretë është Edirne me 2.56 milionë turistë, kryesisht bullgarë që shkojnë për blerje. Më pas vijnë Muğla në bregdetin e Egjeut me 1.83 milionë vizitorë, përfshirë destinacionet Bodrum dhe Marmaris, si dhe Izmiri me rreth 900 mijë turistë. /AutoPortali