Kur Koenigsegg zbuloi motorin e tij elektrik Dark Matter, shumë mbetën të impresionuar. Motori peshon vetëm 39 kg dhe zhvillon 800 kuaj fuqi dhe 1,250 Nm çift rrotullues.

Por tani prodhuesi britanik i motorëve Yasa po prezanton një motor të ri elektrik që ka pak më pak kuaj fuqi, por gjithashtu peshon dukshëm më pak, transmeton AutoPortali.

Yasa ka zhvilluar një motor të ri elektrik që përdor teknologji aksiale. Javën e kaluar, motori u testua dhe arriti të jepte 748 kuaj fuqi, pavarësisht se peshonte vetëm 13.1 kg. Kjo është dendësia më e lartë e fuqisë e matur ndonjëherë për një motor elektrik, dhe kompania e përshkruan këtë arritje si një rekord botëror jozyrtar. Motori ka një dendësi fuqie prej 57 kuaj fuqi/kg krahasuar me Dark Matter, i cili ka 19 kuaj fuqi/kg.

Prodhuesi thotë se motori elektrik nuk është bërë nga ndonjë material ekzotik, që do të thotë se prodhimi i tij masiv nuk duhet të jetë shumë i shtrenjtë.

Motori mund të prodhohet me një shpejtësi prej 50,000 njësive në vit, raporton Electrek. Prodhuesi i motorëve planifikon të kryejë testime shtesë më vonë këtë vit. E themeluar në vitin 2009, Yasa është bërë një lider botëror në zhvillimin e motorëve elektrikë me teknologji aksiale vitet e fundit. Sot, motorët elektrikë të kompanisë përdoren në modele të tilla si Ferrari SF90 Stradale hibrid dhe disa makina nga Mercedes-AMG.