Një studim i ri i Universitetit të Michiganit tregon se drejtimi i një makine elektrike do të ulë emetimin e gazrave serrë krahasuar me makinën me benzinë, pavarësisht vendndodhjes, për sa kohë jetoni brenda SHBA-së kontinentale.

EV-të janë më të pastra se makinat me benzinë

Sipas AutoBlog, autorët e studimit e përshkruajnë atë si “më të plotë deri më sot”. Një kalkulator online do të lejojë drejtuesit të llogarisin emetimet e gazrave serrë bazuar në makinën që vozisin, sjelljen e tyre në rrugë dhe vendndodhjen.

“Elektrifikimi i automjeteve është një strategji kyçe për klimën. Transporti gjeneron 28% të emetimeve të gazrave serrë dhe duhet t’i reduktojmë këto për të kufizuar efektet e ardhshme klimatike, si përmbytjet, zjarret dhe thatësirat, të cilat po shtohen në intensitet dhe frekuencë,” tha Greg Keoleian, autori kryesor i studimit dhe profesor në Shkollën për Mjedis dhe Qëndrueshmëri në Universitet.

Makina elektrike më të pastra “nga lindja deri në grobë”

Studimi analizoi ndikimin mjedisor të çdo lloji makine gjatë gjithë jetës së saj, jo vetëm gjatë një periudhe të caktuar. U morën parasysh faktorë si klasa e makinës, sjellja e drejtuesit dhe vendndodhja.

Pjesë e analizës ishin makinat me motor djegie të brendshme, hibride, hibride plug-in dhe elektrike plotësisht. Për hibride, studiuesit e U-M gjithashtu konsideruan sa shpesh drejtuesit përdornin energjinë e baterisë ose benzinën.

Rezultati: EV-të emetojnë më pak gjatë gjithë jetës së tyre se çdo lloj makine tjetër në çdo qark të SHBA-së. Pik-up-et me djegie, të njohura për popullaritetin e tyre, rezultuan më ndotëse.

Madje, një pik-up elektrik që transporton 1,130 kg mallra mund të emetojë 30% më pak se një pik-up me motor djegie pa ngarkesë. Sedanët e vegjël elektrikë janë më të pastrët, kryesisht për shkak të baterive më të vogla dhe emetimeve të ulëta për milje.

Bateritë më të mëdha dhe autonomia më e gjatë mund të ndikojnë negativisht në efikasitetin e EV-ve. Makina me emetim më të ulët ishte një sedan kompakt me rreth 320 km autonomi.

Kultura amerikane e makinave në kundërshtim me efikasitetin

Studimi vëren probleme të dukshme në kulturën e makinave në SHBA. Blenësit shpesh zgjedhin EV-të me kapacitet më të madh dhe autonomi më të gjatë se sa u nevojitet.

Për të reduktuar efektivisht emetimet, Keoleian sugjeron të përputhni makinën me nevojat reale: “Nëse punoni në ndërtim, mund t’ju duhet një pik-up, por mund të merrni një pik-up elektrik. Nëse udhëtoni vetëm në punë, rekomandoj një sedan elektrik.” /AutoPortali