Grupi Volkswagen kishte planifikuar të dërgonte markën Cupra në Shtetet e Bashkuara deri në fund të kësaj dekade. Por ky plan, i shpallur rreth një vit më parë, është shtyrë zyrtarisht. Prodhuesi spanjoll ka “vendosur në mënyrë strategjike të shtyjë” hyrjen në tregun amerikan për pas vitit 2030. Si arsye për këtë vendim, përmendet “situata sfiduese në industrinë automobilistike dhe dinamika e ndryshueshme e tregut.”
Deklarata, megjithëse e paqartë, nuk përmend tarifat doganore, por është e qartë se klima e paqëndrueshme në SHBA ka ndikuar në vendimin e grupit VW për të vonuar nisjen e Cuprës. Fillimisht, kompania synonte të sillte modelin elektrik Formentor dhe një SUV tjetër më të madh, por jo të gjitha makinat do të ishin elektrike.
Ish-drejtori ekzekutiv i SEAT dhe Cupra, Wayne Griffiths, pati deklaruar në fund të vitit të kaluar se në planet për tregun amerikan përfshiheshin edhe modele hibride, plug-in hibride dhe me motorë tradicionalë me djegie të brendshme.
Strategjia përfshinte hapjen e 20 të ashtuquajturave “Cupra City Garages”, në bashkëpunim me Penske, në bregdetin lindor, atë perëndimor dhe në shtetet e Rripit të Diellit (Sun Belt), shkruan Motor1, transmeton AutoPortali.
Në vend se të përsërisnin linjën evropiane, Cupra planifikonte një portofol specifik për SHBA-në, përfshirë edhe një model të prodhuar lokalisht. Modelet e reja do të ishin më të mëdha dhe me një gjuhë dizajni të përshtatur për shijet amerikane. Objektivi në afat të mesëm ishte arritja e 100 mijë shitjeve në vit.
Cupra thekson se bëhet fjalë për një shtyrje, jo anulim: “Nuk po ndalojmë, vetëm po shtyjmë nisjen tonë në SHBA dhe do të vazhdojmë të ndjekim zhvillimet e tregut në vitet në vijim për të përcaktuar kohën dhe qasjen më të mirë, në përputhje me vizionin afatgjatë të markës,” deklaroi Sven Schuwirth, zëvendëspresident ekzekutiv për Shitjet, Marketingun dhe Shërbimet pas-shitjes në SEAT.
Ndërkohë, Cupra ka regjistruar gjysmën më të mirë të parë të vitit në historinë e saj, me 167,600 njësi të dorëzuara një rritje prej 33.4% krahasuar me të njëjtën periudhë të vitit të kaluar.
Që nga ndarja nga SEAT në vitin 2018, marka ka shitur mbi 900,000 automjete dhe pritet të arrijë shifrën prej një milion shitjesh në muajt e ardhshëm. Cupra tani po i kalon për nga shitjet vetë SEAT-in, i cili ka pësuar një rënie prej 21.4% në 135,000 njësi, ose 32,600 më pak makina sesa marka më e re.
Njoftimi i Cuprës vjen menjëherë pas një vendimi të ngjashëm nga Renault, i cili kishte planifikuar të sillte nën-markën Alpine në SHBA deri në vitin 2027. Gjatë një thirrjeje të fundit me investitorët, drejtori financiar dhe njëkohësisht CEO i përkohshëm i Renault, Duncan Minto, deklaroi se shtyrja lidhet me paqartësitë e vazhdueshme në tregun amerikan: “Duke parë çfarë po ndodh aktualisht në SHBA, nuk mendoj se është momenti i duhur për të shpenzuar para.”/AutoPortali
