Rruga e Rally Dakar 2026, që do të zhvillohet nga 3 deri më 17 janar, u prezantua zyrtarisht në Soria të Spanjës.
Edicioni i ardhshëm i legjendarit Dakar sjell një itinerar tërësisht të ridizenjuar përmes Arabisë Saudite, me një risi të madhe, nuk përfshin më zonën e famshme, por jashtëzakonisht të vështirë, “Blloku i Zbrazët” (“Empty Quarter”).
Në vend të dunave gjigante dhe navigimit tepër të ndërlikuar që e karakterizojnë atë zonë, edicioni i 48-të do të kalojë nëpër pjesën perëndimore dhe qendrore të vendit, duke kombinuar shkretëtira me gurë, male dhe lugina piktoreske.
Starti dhe finishi do të jenë në Yanbu, në breg të Detit të Kuq.
“Blloku i Zbrazët” gjatë viteve të fundit është bërë segmenti vendimtar i rallyt, aty krijoheshin diferencat më të mëdha të kohës dhe shpesh vendosej fituesi.
Vendimi për ta shmangur këtë vit e ndryshon karakterin e itinerarit, por organizatorët theksojnë se konfigurimi i ri sërish garanton sfidë ekstreme.
Dakar 2026 do të jetë i shtati radhazi që zhvillohet në Arabinë Saudite.
Gjatësia totale e rrugës kalon 8.000 kilometra, nga të cilat 5.000 km janë etapa speciale me matje kohe.
Para kësaj, nga viti 2009 deri në 2019, Dakar u zhvillua në Amerikën e Jugut.
Edicioni i parë u mbajt në vitin 1978, nga Parisi në Francë deri në Dakar të Senegalit, por nga 1992 deri në 2007 shpesh nuk niste nga Parisi dhe nuk përfundonte në Dakar, kryesisht për shkak të pasigurive në Afrikë.
Pikërisht për arsye sigurie në Mauritani, edicioni i vitit 2008 u anulua, dhe ralli më pas u largua përgjithmonë nga kontinenti afrikan.
Në Dakar marrin pjesë si amatorë ashtu edhe profesionistë, të cilët përbëjnë vetëm rreth tetë për qind të garuesve, në shtatë kategori: automjete, motoçikleta, kamionë, Challenger T3, SSV T4, Classics dhe Mission 1000 (automjete elektrike dhe me hidrogjen që garojnë 1.000 km).
Kampionët në fuqi nga viti 2025 janë: Yazeed Al-Rajhi (automjete), Daniel Sanders (motoçikleta), Martin Macik (kamionë), Nicolas Cavigliasso (T3), Brock Heger (T4), Carlos Santaolalla (Classics) dhe Jordi Juvanteny (Mission 1000).
