Pas një periudhe të zymtë në vitin 2022, marka amerikane Buick, në pronësi të General Motors, po tregon shenja rimëkëmbjeje në SHBA, ndërsa në Kinë – tregu që dikur e shpëtoi nga zhdukja – po përballet me një rënie të ndjeshme të shitjeve.
Në fund të vitit 2022, Buick kishte shënuar një rënie të madhe në SHBA me vetëm 103,519 njësi të shitura, një rënie prej 42.4% krahasuar me një vit më parë. Por në vitin 2024, marka u rikthye fuqishëm duke arritur 183,421 njësi të shitura, një rritje prej 9.8% krahasuar me 2023-ën. Suksesi u udhëhoq nga modelet SUV Encore GX dhe Envista, të cilat së bashku gati sa arritën volumin e përgjithshëm të shitjeve të vitit 2022.
Ndërkohë, në Kinë, ku Buick kishte përjetuar një ngritje të madhe pas bashkëpunimit me SAIC Motor (partner 50%), situata është përmbysur. Sipas AutoWeek, pas arritjes së kulmit në vitin 2016 me 1.23 milionë njësi të shitura, shitjet kanë rënë në mënyrë të vazhdueshme.
Në vitin 2023, Buick shiti vetëm 517,600 njësi, një rënie prej 19.7% krahasuar me vitin paraprak. Edhe pse këto shifra janë ende më të larta se ato të Chevrolet dhe Cadillac në Kinë, marka vendore e GM-së, Wuling, dominoi me 1.2 milionë njësi të shitura – më shumë se kulmi historik i vetë Buick-ut.
Kina, dikur shpëtimtare e markës pas falimentimit të GM-së në 2009, tani po e shtyn Buick-un drejt një statusi dytësor, përballë konkurrencës së ashpër të prodhuesve vendas si BYD dhe Geely, të cilët dominojnë tregun me modele të reja dhe teknologji elektrike.
Megjithatë, GM nuk ka ndërmend të tërhiqet. Në një thirrje me analistët e Wall Street-it, CEO-ja Mary Barra theksoi përkushtimin për tregun kinez dhe rolin që do të luajë Buick përmes automjeteve me energji të reja (NEV) – një kategori që përfshin automjetet elektrike, hibride dhe me rreze të zgjeruar.
Më 21 prill në “Buick Brand Day” në Shanghai, u prezantua nënmarka elektrike Electra dhe platforma e re elektrike Xiao Yao. Modelet konceptuale Electra L dhe Electra LT, që synohen për prodhim së shpejti në Kinë, premtojnë dizajn modern dhe performancë të përmirësuar, të frymëzuara nga modelet e mëparshme Regal dhe Regal Wagon.
Megjithëse disa analistë sugjerojnë që Buick të rikthehet në rrënjët e saj si një markë gjysmë-premium, GM thekson se marka synon një spektër të gjerë konsumatorësh në Kinë – nga segmenti mainstream deri te ai premium.
Për vitin 2025, gama e saj përfshin:
Verano Pro – sedan kompakt premium
Velite – crossover i ulët
Regal & Regal GS – sedanë të bazuar në Opel Insignia
LaCrosse i përditësuar
GL8 MPV – me shumë variante, përfshirë versionin luksoz Century dhe ES PHEV
SUV-të si Envision S, Envision Plus, Enclave, si dhe Electra E5, një SUV elektrik i përmasave të ngjashme me Chevrolet Equinox EV, që pritet të debutojë në SHBA në vitin 2026. /AutoPortali
