Hyundai po bëhet gati të rishkruajë historinë e modelit të saj më të shitur  Tucson. SUV-i i njohur i segmentit të mesëm do të hyjë në gjeneratën e pestë me një transformim të thellë estetik dhe teknologjik, i cili pritet të debutojë në gjysmën e dytë të vitit 2026.

Pamjet e para të makinave testuese të kamufluara në rrugët publike kanë zbuluar konturet e një Tucson-i tërësisht të ndryshuar. Modeli i ri do të marrë një formë më katrore dhe agresive, e frymëzuar nga Santa Fe i madh, duke reflektuar gjuhën e re të dizajnit të markës “Arti i Çelikut”. Kjo qasje vizuale, tashmë e aplikuar edhe te SUV-i me hidrogjen Nexo, ka për qëllim ta dallojë secilin model si një “figurë shahu”, dhe jo si “kukullat ruse”, sipas shefit të dizajnit të Hyundai, Simon Loasby, shkruan Autocar, transmeton AutoPortali.

Tucson-i i ri do të prezantohet me kapakun më të gjatë të motorit, harqe më të theksuara të rrotave dhe një qëndrim më të drejtë e muskuloz. Sipas Loasby, kjo është një përpjekje për t’i dhënë modelit një karakter më të vërtetë SUV, në përputhje me kërkesat globale për pozicion më të ngritur drejtimi dhe më shumë funksionalitet terreni.

Ndryshimet në dizajn pritet të sjellin hapësirë më të madhe të brendshme dhe ndoshta një rritje të kapacitetit të bagazhit, i cili aktualisht është 620 litra. Brendësia do të pasqyrojë filozofinë e re të Hyundai-t për modelet e ardhshme: më pak ndërfaqe digjitale të ndërlikuara, më shumë butona fizikë, dhe një infotainment më të thjeshtë për të përmirësuar sigurinë dhe përvojën e përdorimit. Këto ndryshime janë konfirmuar edhe nga shefi i dizajnit të Hyundai Group, Luc Donckerwolke.

Nga ana mekanike, priten versione të ngjashme me Santa Fe-në, përfshirë një motor hibrid 1.6 litra turbo me 212 kuaj fuqi dhe një hibrid plug-in me 249 kuaj fuqi, ky i fundit vetëm me tërheqje në të katër rrotat. Këto opsione do t’i japin Tucson-it një kombinim të balancuar mes efikasitetit dhe performancës.

Tucson ka qenë një shtyllë qendrore e suksesit global të Hyundai, me rreth 600,000 njësi të shitura vetëm vitin e kaluar. Në Evropë, ai ka luajtur një rol kyç në konkurrimin e markave të konsoliduara si Volkswagen dhe BMW, dhe me këtë rifreskim radikal, Hyundai synon të thellojë më tej praninë e vet në tregun e SUV-ve.

Gjenerata e re e Tucson-it nuk është thjesht një përditësim – është një deklaratë e qartë e ambicieve të Hyundai-t për të udhëhequr, jo vetëm për të ndjekur.