Edhe pse tingëllon e pabesueshme, gjithnjë e më shumë të rinj përjetojnë ankth kur duhet të furnizojnë makinën me karburant. Sipas një studimi të gazetës britanike The Times, 62% e shoferëve të moshës 18–24 vjeç pranojnë se kanë frikë të shkojnë në pikat e karburantit, ndërsa ky problem prek 39% të të gjithë shoferëve, pavarësisht moshës.

Burimi kryesor i stresit nuk është frika nga hedhja e karburantit të gabuar, por pasiguria gjatë parkimit pranë pompës, përdorimit të pompës së karburantit dhe frika se mos bëjnë gabime para të tjerëve.

Për këtë arsye, shumë të rinj preferojnë t’u kërkojnë prindërve ose miqve të furnizojnë makinën në vend të tyre. Madje, gjysma e të anketuarve pranuan se vazhdojnë të ngasin automjetin me rezervën pothuajse bosh vetëm për të shmangur ndalimin në pikën e karburantit, ndërsa një e katërta kanë mbetur të paktën një herë pa karburant gjatë rrugës.

Studimi tregon gjithashtu një prirje më të gjerë: të rinjtë po ngasin makinën gjithnjë e më pak. Nëse në vitin 1989 çdo i dyti i moshës 17–20 vjeç kishte patentë, sot atë e ka vetëm një në katër. Për më tepër, 96% e tyre thonë se ndihen në ankth kur duhet të parkojnë paralel ose mbrapsht, duke ia lënë shpesh timonin shoferëve më me përvojë.