Shitjet e makinave të reja Tesla në Britani kanë rënë në më shumë se 45% në maj krahasuar me një vit më parë, duke nënvizuar sfidat me të cilat përballet Elon Musk ndërsa ai ripërtërin fokusin e tij te prodhuesi i automjeteve elektrike, transmeton AutoPortali.
Shitjet e markës ranë për të pestin muaj radhazi në Mbretërinë e Bashkuar, Gjermani dhe Itali, sipas të dhënave nga firma kërkimore New Automotive. Rënia e shitjeve në Mbretërinë e Bashkuar, tregu më i madh i automjeteve elektrike në Evropë, erdhi ndërsa shitjet e makinave elektrike në të gjithë industrinë u rritën me 28%.
Të dhënat paraprake nga firma kërkimore New Automotive treguan se Tesla shiti 1,758 njësi në Britani muajin e kaluar, nga 3,244 një vit më parë. Megjithatë, deri më tani këtë vit, Tesla mbeti automjeti elektrik me bateri më i shitur në Britani.
Musk, 53 vjeç, njeriu më i pasur në botë, u largua nga Shtëpia e Bardhë javën e kaluar pasi udhëhoqi një nismë për të ulur ” shpërdorimin, mashtrimin dhe abuzimin “qeveritar, shkruan The Times.
Gjatë kohës që ai punoi si këshilltar i Presidentit Trump, kompania e tij pësoi rënie si në shitje ashtu edhe në çmimin e aksioneve. Protestuesit u kanë kërkuar klientëve të bojkotojnë markën për shkak të përqafimit të Musk ndaj politikës së ekstremit të djathtë në Evropë dhe përpjekjeve të tij për të bërë shkurtime të mëdha në fuqinë punëtore federale të SHBA-së dhe fondet për projekte humanitare.
Një grup investitorësh të Teslës i shkruan bordit të kompanisë javën e kaluar duke i kërkuar asaj që ta detyronte Musk të angazhohej për të paktën 40 orë në javë në menaxhimin e Teslës. Grupi i fondeve të pensioneve tha se “rënia e reputacionit global” të kompanisë ishte një “shkak për shqetësim serioz”.
Në Kinë dhe Evropë, shitjet janë goditur nga përparimi i automjeteve elektrike kineze me çmime konkurruese. Shitjet e Tesla-s në Gjermani ranë me më shumë se një të tretën në maj, tha të mërkurën agjencia gjermane e trafikut rrugor KBA, edhe pse shitjet e makinave elektrike atje u rritën me 45%.
KBA tha se Tesla shiti 1,210 makina në Gjermani muajin e kaluar, 36% më pak se një vit më parë. Shitjet për rivalin e saj kinez BYD u rritën nëntëfish në 1,857.
Një zëdhënës i Teslës tha se kërkesa për versionin e ri të kompanisë të Model Y, i cili ishte makina më e shitur në Evropë deri në vitin 2023, do të rriste shitjet në qershor kur të fillojnë dërgesat në Mbretërinë e Bashkuar.
Në Norvegji, Modeli i ri Y, të cilin Tesla ka filluar ta shpërndajë atje, ka rritur shitjet. Shpërndarjet fillojnë këtë muaj në një numër tregjesh të tjera evropiane.
Aksionet e Teslës të listuara në bursën e Nju Jorkut ranë me 12.22 dollarë, ose 3.6 përqind, duke u mbyllur në 332.05 dollarë të mërkurën në mbrëmje./AutoPortali
