Kampioni i botës për vitin 2024, Thierry Neuville, beson se Rally Finland duhet të jetë më i ngadaltë pas numrit të madh të aksidenteve në edicionin e këtij viti, por rivalët e tij nuk ndajnë të njëjtin mendim.

Thierry Neuville deklaroi se Rally Finland i fundjavës së kaluar ishte “shumë i shpejtë”, pasi gara u karakterizua nga një numër i pazakontë aksidentesh të rënda. Rally Finland njihet për etapat e saj tepër të shpejta në zhavorr dhe edicioni i këtij viti ishte i dyti më i shpejtë në historinë e Kampionatit Botëror të Rally-t (WRC), me një shpejtësi mesatare prej 128,2 km/h.

Vetë Neuville pësoi dëmtime në pezullimin e përparmë të majtë pasi doli jashtë piste, ndërsa pilotë të tjerë si Sébastien Ogier, Elfyn Evans, Mārtiņš Sesks dhe Esapekka Lappi u përmbysën gjatë garës.

“Është tepër e shpejtë. Në disa sektorë mesatarja arrinte 145-147 km/h. Rrugët ishin shumë të drejta dhe mendoj se gara duhet të jetë më e ngadaltë. Ky ishte Rally Finland më i shpejtë që kam zhvilluar ndonjëherë”, tha Neuville.

Megjithatë, lideri i kampionatit, Elfyn Evans, nuk u pajtua me këtë qëndrim. Sipas tij, aksidentet janë pasojë e faktit se pilotët po shtyjnë vazhdimisht kufijtë për të fituar kohë dhe jo domosdoshmërisht e shpejtësisë së etapave.

Edhe Adrien Fourmaux mendon se problemi kryesor ishte ndryshimi i vazhdueshëm i nivelit të kapjes së gomave në rrugë, ndërsa piloti i M-Sport Ford, Jon Armstrong, shtoi se konkurrenca shumë e ngushtë i detyron pilotët të marrin më shumë rreziqe.

Sipas Armstrong, në Rally Finland një gabim i vogël në shpejtësi mbi 150 km/h mund të përfundojë lehtësisht në një aksident të madh. Ai pranoi se organizatorët mund ta ngadalësojnë garën me disa shikane, por theksoi se pikërisht shpejtësia është ajo që e bën Rally Finland një nga garat më të veçanta në kalendarin e WRC-së.