Spanja është kualifikuar në finale të EURO 2024, pasi e ka mposhtur Francën me rezultat 2:1.

Rasti i parë për gol i takoi Spanjës që rrezikoi në minutën e pestë përmes Fabian Ruiz, i cili me kokë ishte pranë shënimit.

Franca arriti të kalojë në epërsi në minutën e nëntë me anë të Randal Kolo Muanit i cili u asistua nga Kylian Mbappe për rezultatin 1-0.

Nuk vonoi shumë dhe erdhi reagimi i Spanjës që arritën të shënojnë dy gola të shpejtë për të rikthyer avantazhin në të mirë të tyre.

Fillimisht për të barazuar rezultatin në 1-1 u përkujdes Lamine Yamal (21’) që shënoi një super gol nga distanca.

Ylli i ri i Spanjës hyri në histori, duke u bërë futbollisti më i ri që shënon në Kampionatin Evropian.

Goli i dytë dhe ai që i solli kualifikimin Spanjës u shënua në minutën e 25-të, ku goditjen e Dani Olmos e devijoi në portë Jules Kounde për 2-1.

Në pjesën e dytë Spanja arriti ta menaxhojë mirë epërsinë e krijuar në pjesën e parë duke u kualifikuar kështu në finalen e Berlinit.

Spanja ishte shumë afër që të shënonte golin e qetësisë me Lamine Yamal (81’) por gjuajtja e tij e fortë për fat të mirë të francezëve përfundoi mbi portë.

Një rast të mirë shënimi e pati edhe Kylian Mbappe i cili u gjend në një situatë të favorshme përballë portës në minutën e 86-të, por gjuajtja e tij shkoi krejtësisht jashtë portës.

Finalja e madhe e EURO 2024 do të luhet më datë 14 korrik në Berlin, aty ku Spanja do të takohet me fituesin e ndeshjes Holandë-Angli që do të luhet nesër (10 korrik) me fillim nga ora 21:00.