Ardian Ismajli padyshim e ka lënë pas faktin që u la në bankinë dhe nuk luajti asnjë minutë në Evropian. Këtë e tregoi me Kombëtaren shqiptare ndaj Ukrainës, me performancën e tij që thjesht konfirmoi rikthimin e tij.

Sidoqoftë, kur një mbrojtës shënon, e kur për më tepër shpallet lojtari më i mirë i ndeshjes, kjo padyshim që ka një kuptim të madh.

Jo vetëm te Kombëtarja, por Ismajli duket se po arrin kulmet edhe tek Empoli, teksa vetëm pasditen e së shtunës ishte padyshim protagonist i skuadrës së tij, në barazimin e madh përballë Juventus, ku përballë kishte një prej sulmuesve më të mirë të Evropës, Dusan Vlahovic.

Në skuadrën toskane jo vetëm që është titullar i padiskutueshëm, dhe po flasim për nivelin e Serie A, por madje trajneri hera-herës i ka besuar edhe shiritin e kapitenit. Një vlerësim i lartë dhe plotësisht i merituar, teksa është lënë pas sezoni i kaluar, kur mbrojtësi 27-vjeçar pati dëmtime, dhe shpesh humbi ndeshje në Itali.