Kosova mund të përballet me një krizë serioze energjetike duke nisur nga dita e nesërme, 21 qershor, me paralajmërime për mungesë të theksuar të prodhimit vendor të energjisë elektrike. Kompania për Furnizim me Energji Elektrike në Kosovë (KESCO) ka bërë të ditur se, në rastin më ekstrem, e gjithë kërkesa për energji nga konsumatorët do të duhet të mbulohet përmes importit – një skenar i vështirë teknikisht dhe tejet i kushtueshëm financiarisht.

Në një njoftim për mediat, KESCO ka theksuar se po ndërmerr përpjekje intensive për të siguruar sasinë e nevojshme të energjisë nga jashtë dhe për të ruajtur stabilitetin në sistemin energjetik të vendit. Por çmimet e larta në tregjet ndërkombëtare dhe sfidat logjistike përbëjnë pengesa serioze.

“Importimi i një sasie kaq të madhe paraqet vështirësi të konsiderueshme si nga aspekti teknik, ashtu edhe ai financiar,” thuhet në deklaratën e KESCO-s, transmeton AutoPortali.

Për këtë arsye, kompania ka lëshuar një thirrje urgjente për kursim të energjisë elektrike nga të gjithë konsumatorët, në mënyrë që të zbutet sa më shumë ndikimi i kësaj situate të vështirë.

Zhvillimet e ditëve në vijim do të jenë vendimtare për furnizimin energjetik të vendit, ndërsa qytetarët pritet të luajnë një rol kyç përmes përdorimit të kujdesshëm dhe të përgjegjshëm të rrymës./AutoPortali