Nën-marka e re e performancës së lartë e Genesis, e quajtur Magma, po përgatitet të hyjë fuqishëm në treg, duke nisur me modelin GV60 Magma që do të dalë në shitje në Korenë e Jugut në fund të këtij viti. Versioni konceptual i kësaj makine elektrike u prezantua për herë të parë verën e kaluar gjatë ngjitjes së famshme në kodrën e Goodwood, ndërsa imazhet zyrtare pritet të publikohen në nëntor.

Në vitin 2026 dhe më tej, linja Magma do të zgjerohet me më shumë modele rrugore dhe madje edhe një hipermakinë hibride me motor V8, e ndërtuar për Le Mans, e cila tashmë është në fazën e testimit, shkruan TopGear, transmeton AutoPortali.

Genesis, markë e krijuar nga Hyundai, do të mbështetet fuqishëm në përvojën teknike të grupit mëmë. GV60 Magma, për shembull, pritet të përdorë shumë nga teknologjitë e përdorura në Hyundai Ioniq 5 N  përfshirë një motor elektrik me rreth 600 kuaj fuqi dhe sistem vektorizimi të çift rrotullues  por me një ndjesi më të sofistikuar dhe më luksoze.

Duke folur për Top Gear, Tyrone Johnson, drejtues i Qendrës Teknike Hyundai Motor Europe (HMETC) pranë Frankfurtit, konfirmoi se pas GV60, të gjitha modelet Magma do të zhvillohen në Gjermani. Johnson, i njohur për rolin e tij në projektimin e Ford Focus RS dhe testimin e Ioniq 5 N, e konsideron këtë zhvillim si një hap të rëndësishëm për të dhënë më shumë individualitet markës Magma.

Modeli i parë Magma i zhvilluar në Evropë pritet të prezantohet në vitin 2027. Sipas Johnson, ai do të jetë shumë më kompleks në ndërtim sesa GV60, duke reflektuar një filozofi të re që i jep përparësi jo vetëm performancës, por edhe rafinimit të përvojës së drejtimit.

Magma nuk do të kufizohet vetëm në automjetet elektrike. Genesis ka prezantuar gjithashtu koncepte për një SUV GV80 Magma për tregun amerikan dhe një version të G80 për rajonin e Lindjes së Mesme, që favorizon motorët me konsum më të lartë benzine.

Manfred Harrer, kreu i zhvillimit të Hyundai Group në Kore, deklaroi se platforma e ardhshme për automjetet Genesis do të jetë specifike për EV, por do të përfshijë edhe mundësinë e integrimit të teknologjive si EREV (electric range extender vehicle), ku një motor benzine gjeneron energji për të zgjatur autonominë elektrike të automjetit.

Në krahasim me markën N të Hyundai-t, Magma synon një qasje më të rafinuar. “N është makina që sfidon kthesat. Magma do të jetë e aftë për në pistë, por kjo nuk është qëllimi i saj,” tha Johnson. “Është një makinë drejtimi më luksoze, më elegante. Fuqia është e rëndësishme, por jo gjithmonë vendimtare. Pesha, diapazoni dhe ndjesia janë çelësat.”

Ai theksoi se softueri tashmë luan një rol kyç në ndërtimin e karakterit të makinës: “Kam punuar për katër dekada në industrinë e automobilizmit. Më parë gjithçka ishte mekanikë. Sot gjithçka është softuer  dhe kjo e ndryshon rrënjësisht mënyrën si ndërtojmë dhe përjetojmë makinat.”

Magma premton të sjellë një epokë të re në segmentin e automjeteve të performancës së lartë, duke ndërthurur teknologjinë elektrike, luksin dhe përvojën dinamike të drejtimit. Me hyrjen e saj në treg, gara për dominimin e botës EV bëhet edhe më interesante.