Jasir Asani është zyrtarisht pjesë e klubit Esteghlal, një prej emrave më të mëdhenj në futbollin iranian. Sulmuesi shqiptar i bashkohet gjigantit aziatik pas një periudhe të suksesshme me Gwangju FC në Korenë e Jugut, në një transferim që raportohet të jetë mbyllur për rreth 1 milion euro.

Fillimisht ishte planifikuar që Asani t’i bashkohej skuadrës në muajin janar, por marrëveshja u përshpejtua dhe lojtari është tashmë në dispozicion të trajnerit, duke kënaqur të gjitha palët e përfshira në transferim, transmeton AutoPortali.

Esteghlal, një nga klubet më të titulluar dhe më të mbështetur në Iran, ka njoftuar me entuziazëm afrimin e Asanit, ndërsa tifozët e klubit kanë shfaqur menjëherë mbështetje për lojtarin shqiptar në rrjetet sociale.

Pas aventurës në Korenë e Jugut, ku Asani spikati me shpejtësinë dhe teknikalitetin e tij, pritet që ai të sjellë risi dhe energji në fazën ofensive të ekipit iranian.

Sytë tashmë janë të drejtuar drejt performancës së tij në kampionatin iranian, ku pritet të jetë një nga pikat kyçe të skuadrës.

Transferimi i Asanit ka qenë pjesë e spekulimeve të vazhdueshme në muajt e fundit, me shumë paqartësi dhe ndryshime të datave.

Megjithatë, me zyrtarizimin e marrëveshjes, një tjetër histori e gjatë e merkatos për futbollin shqiptar merr fund këtë herë, me një epilog pozitiv për lojtarin dhe tifozët. /AutoPortali