Pas një kualifikimi zhgënjyes në Çmimin e Madh të Hungarisë, ku u rendit vetëm i 12-ti, Lewis Hamilton u kritikua nga vetja duke thënë: “Jam unë faji çdo herë. Jam absolutisht i padobishëm. Mbase duhet të ndryshojmë pilotin”.

Por ish-shefi i tij te Mercedes, Toto Wolff, mendon se Hamilton e teproi me këtë vetëkritikë dhe i tha personalisht se nuk ishte e drejtë.

“Ia thashë atë mbrëmje dhe përsëri ditën tjetër”, tha Wolff.

“Ai është ende GOAT-i (më i madhi i të gjitha kohërave). A keni dëgjuar ndonjëherë Michael Jordan të thotë për veten se është i padobishëm dhe se duhet zëvendësuar? Jo”.

Wolff e pranoi se ndjenjat dhe sinqeriteti i Hamiltonit janë pjesë e asaj që e bëjnë atë yll, por kjo deklaratë ishte thjesht një moment i dobët emocional që nuk pasqyron të vërtetën.

Ai shtoi gjithashtu se karriera e Hamiltonit nuk do të gjykohet nga koha e tij te Ferrari, ashtu siç koha e Schumacher te Mercedes nuk errësoi arritjet e tij me Ferrari.

Pavarësisht një sezoni të vështirë me Ferrari, Wolff beson se Hamilton ka ende potencial për të fituar:

“Nëse Ferrari ka makinën më të mirë, ai me përvojën e tij mund të fitojë titullin”.

Përsa i përket raportit të Hamilton me Ferrarin, Wolff kujtoi se edhe te Mercedes kishte momente pakënaqësie, por shtoi: “Ai kishte nevojë për një ndryshim ambienti – dhe edhe ne. Çdo pilot ëndërron të garojë për Ferrarin. Ai e pëlqen ngjyrën e kuqe. Marrëveshja ishte shumë e mirë”.