Lewis Hamilton ka eutanazuar qenin e tij të dashur, Rosco, pas 13 vitesh së bashku. Bulldogu anglez, i ndjekur nga mbi 1.4 milion fansa në Instagram, vuante nga pneumonia dhe qëndroi katër ditë në aparate. Më herët, Hamilton kishte humbur edhe qenin tjetër, Koko, të cilën e kishte shpëtuar nga eutanazia në vitin 2013.

Por, jo shumë njerëz e dinë që edhe Michael Schumacher ishte një dashamirës i madh i kafshëve, veçanërisht i qenve. Në Çmimin e Madh të Brazilit më 1996, një qen endacak hyri papritur në pistë gjatë një seance stërvitore dhe Schumacher, me shpejtësi të madhe, e shmangu për pak një aksident. Më vonë, i njëjti qen filloi ta ndjekë atë dhe familjen e tij në zonën e padokut. Meqë askush nuk po kujdesej për të dhe rrezikonte eutanazinë, familja Schumacher e adoptoi dhe e quajti Floh (që do të thotë “plesht” në gjermanisht). Po atë vit, Michael fitoi garën e tij të parë me Ferrarin dhe Floh u bë fat i mirë për të.

Falë një lejeje të veçantë nga Bernie Ecclestone, Floh udhëtonte me Schumacher në garat anembanë botës dhe flinte shpesh në garazhin e Ferrarit. Më vonë, ai adoptoi edhe një qen tjetër, një qen të racës Belgian Shepherd, me emrin Shiva.

Schumacher ishte piloti i fundit që lejoi të sillte qenin e tij në garat e F1. Rregullat e sotme të FIA-s, sidomos pas pandemisë, nuk lejojnë më praninë e kafshëve në zonën e padokut, për arsye sigurie dhe organizimi.