Motoçiklisti zviceran Noah Dettwiler ka marrë lejen mjekësore për t’u rikthyer në Zvicër, pasi gjendja e tij është përmirësuar ndjeshëm më shumë se një javë pas aksidentit të rëndë që pësoi para Çmimit të Madh të Malajzisë në Moto3.

Piloti i ekipit CIP Green Power u përplas në pistën “Sepang” kur, për shkak të një problemi teknik, po largohej nga pista dhe u godit aksidentalisht nga Jose Antonio Rueda, kampioni i ri i Moto3.

Dettwiler pësoi disa sulme në zemër dhe u reanimua në vendin e ngjarjes, përpara se të dërgohej në spital në Kuala Lumpur. Ai iu nënshtrua disa operacioneve urgjente, iu hoq shpretka dhe iu trajtua një frakturë e hapur në këmbë.

Pas përmirësimit të gjendjes, Dettwiler është transferuar në një klinikë private dhe pritet të udhëtojë të enjten drejt Zvicrës, ku do t’i bëhet një tjetër operacion në këmbë. Ai gjithashtu ka thyerje në qafë dhe do të duhet të mbajë një mbajtëse për disa javë.

Ekipi CIP Green Power falënderoi mjekët malajzianë dhe shërbimin zviceran të emergjencës Rega që do të kryejë transportin ajror.

Ndërkohë, Rueda ka pësuar thyerje në dorë dhe kontuzione, por pa dëmtime serioze në kokë apo trup; ai është operuar me sukses në Barcelonë.