Piloti zëvendësues i Tech3 KTM, Pol Espargaro, akuzoi Franco Morbidellin për një manovër “tepër agresive” në xhiron e parë të Çmimit të Madh të Portugalisë, e cila shkaktoi një incident me disa motoçiklistë.
Morbidelli, piloti i VR46 Ducati, u rrëzua dhe u detyrua të tërhiqej nga gara, por Espargaro, një nga ata që ai po përpiqej të parakalonte, e kritikoi ashpër.
“Hyri shumë, shumë agresivisht në kthesën 5, në xhiron e parë, me rezervuarin plot. Kuptoi që nuk mund të ndalte motorin dhe u fut mes nesh. Ishim me fat që nuk ndodhi më keq. Krijoi një efekt domino, gjithçka u bë kaotike”.
Morbidelli nuk foli me mediat pas garës, pasi u raportua se mungoi për arsye mjekësore, megjithëse ishte pa lëndime serioze.
Kjo nuk është hera e parë që italiani përplaset me kolegët në pistë. Më herët gjatë vitit, ai kishte pasur një incident edhe me vëllain e Pol-it, Aleix Espargaro, në garën e Silverstone.
Ndërkohë, Pol Espargaro tha pas garës në Portimao se nuk dëshiron të rikthehet si pilot me kohë të plotë në MotoGP.
“Po më mungon jeta jashtë pistës, po më mungojnë vajzat e mia. Ky presion çdo fundjavë është i madh dhe e di që gjithçka mund të mbarojë në një çast. Dua të kaloj më shumë kohë me familjen”.
