Pas vendimit të Ott Tanak për t’u tërhequr nga garat me kohë të plotë, Hyundai ka nisur punën për të ndryshuar përbërjen e ekipit në Kampionatin Botëror të Rally 2026.

Tanak, kampioni i botës i vitit 2019, njoftoi se pas garës finale në Arabinë Saudite do të largohet nga ekipi për t’iu përkushtuar më shumë familjes, por theksoi se “nuk është një lamtumirë përfundimtare” me sportin.

Drejtori sportiv i Hyundai-t, Andrew Wheatley, pranoi se ekipi kishte prioritet të mbante Tanakun, por kishte përgatitur edhe një “Plan B” në rast largimi. Ai deklaroi se Hyundai ka tashmë një listë të shkurtër kandidatësh për ta zëvendësuar atë dhe se po analizon opsionet mes pilotëve të rinj dhe me përvojë.

Wheatley shtoi se objektivi për vitin 2026 është që Hyundai të jetë sa më konkurrues në sezonin e fundit të epokës Rally1.

Ekipi ende nuk ka bërë njoftime zyrtare për formacionin e vitit 2026, por pritet që Thierry Neuville, kampioni i botës 2024, dhe piloti i ri Adrien Fourmaux të mbeten pjesë e skuadrës.