Në Formula 1 kanë mbetur edhe dy gara dhe një sprint, ndërsa skualifikimi i të dy pilotëve të McLaren-it në Las Vegas e ka rikthyer plotësisht Max Verstappen-in në garën për titull. Lando Norris ka vetëm 24 pikë më shumë se Verstappen dhe shoku i tij i ekipit, Oscar Piastri, ndërsa në lojë mbeten edhe 58 pikë.
Interesant është se Verstappen gjatë verës deklaroi se nuk do të fitonte më asnjë garë këtë sezon, por më pas mori katër fitore, po aq sa dy pilotët e McLaren-it së bashku.
Situata po krahasohet me sezonin 2010, kur Sebastian Vettel fitoi titullin edhe pse dy gara para fundit kishte 25 pikë më pak. Ai fitoi në Brazil dhe më pas shfrytëzoi gabimin strategjik të Ferrarit në Abu Dabi për të marrë titullin e tij të parë.
Ashtu si Vettel atë vit, edhe Verstappen nuk ka kryesuar asnjëherë këtë sezon, por ende ka shanse reale. Për të siguruar titullin e pestë, ai duhet idealisht t’i fitojë të tri garat e mbetura, ndërsa Norris të mos marrë më shumë se dy vende të dyta dhe një vend të gjashtë në sprintin e Katarit.
Vendimi për titullin e këtij sezoni do të zbardhet në dy fundjavat e ardhshme, duke filluar me Çmimin e Madh të Katarit këtë të premte.
