Toyota ka njoftuar rikthimin e emrit Corolla në rally me makinën e re GR Corolla RC2, e cila do të debutojë në garat e American Rally Association (ARA) vitin e ardhshëm.

Makina është zhvilluar nga inxhinierët e Toyota-s në WRC, në bashkëpunim me Rallysport Services, dhe bazohet në përvojën e suksesshme të GR Yaris Rally2. Ajo përdor motor 1.6 litra turbo me tre cilindra, transmetim 4×4 dhe do të garojë në klasën RC2, të krahasueshme me nivelin Rally2.

Në zhvillimin e makinës kanë marrë pjesë ish-pilotët e WRC-së Jari-Matti Latvala dhe Juho Hänninen, ndërsa Seth Quintero do ta drejtojë GR Corolla RC2 në shtatë gara të ARA-së, duke nisur në mars.

Rikthimi i Corolla-s shënon një moment të rëndësishëm për Toyota-n, pasi modeli ka një histori të pasur në rally, me fitore në WRC që nga viti 1973 dhe titull për konstruktorë në vitin 1999.