Kupa e Botës 2026 pritet të shënojë një epokë të re në historinë e futbollit, falë integrimit të thellë të Inteligjencës Artificiale në organizimin dhe zhvillimin e ndeshjeve.
FIFA, në bashkëpunim me kompaninë teknologjike Lenovo, ka zbuluar planet për përdorimin e avatarëve 3D dhe sistemeve të avancuara digjitale, të cilat do të ndihmojnë arbitrat dhe do të përmirësojnë ndjeshëm përvojën e transmetimit për shikuesit në mbarë botën.
Inovacioni kryesor i Botërorit 2026 do të jetë përfshirja e Avatarëve Digjitalë në teknologjinë e arbitrimit dhe në mënyrën e prezantimit të ndeshjeve në transmetim.
Këta avatarë, të animuar në 3D dhe të fuqizuar nga Inteligjenca Artificiale, do të ofrojnë pamje shumë më të detajuara, veçanërisht gjatë rishikimit të situatave të ndjeshme si pozicionet jashtë loje.
Kjo teknologji synon të sjellë më shumë qartësi, transparencë dhe besueshmëri në vendimet e arbitrave.
Presidenti i FIFA-s, Gianni Infantino, e ka cilësuar Kupën e Botës 2026 si “spektaklin më të madh të të gjitha kohërave në planetin Tokë”.
Sipas tij, eventi do të përfshijë rreth 7 milionë tifozë në stadiume, 104 ndeshje të zhvilluara dhe miliarda shikues përmes ekraneve anembanë globit.
Infantino theksoi se FIFA dhe Lenovo janë duke përshtatur plotësisht teknologjitë digjitale dhe konceptin “Football AI” për të mbështetur skuadrat, arbitrat dhe stafin zyrtar, duke garantuar njëkohësisht një përvojë të jashtëzakonshme për tifozët.
Përmes platformës “Football AI”, synohet demokratizimi i aksesit në të dhënat futbollistike, duke u ofruar skuadrave analiza të detajuara dhe të avancuara, ndërsa në të ardhmen edhe tifozët pritet të përfitojnë nga këto informacione.
Gjenerata e re e funksionit “Referee View” do të shfaqë pamje të krijuara nga Inteligjenca Artificiale, duke u dhënë shikuesve ndjesinë sikur ndodhen në vetë fushën e lojës, pranë futbollistëve.
Avatarët 3D të aktivizuar nga AI do të mundësojnë identifikimin dhe gjurmimin e saktë të lojtarëve në kohë reale, duke shënuar një hap të madh përpara në zhvillimin e teknologjisë gjysmë-autonome të pozicionit jashtë loje.
Kjo pritet të sjellë imazhe me cilësi shumë të lartë, vendime më të shpejta dhe një kuptim më të qartë të lojës për publikun, duke e bërë Kupën e Botës 2026 një nga ngjarjet sportive më inovative ndonjëherë./AutoPortali
