Trajneri i ri i Real Madridit, Álvaro Arbeloa, ka reaguar pas humbjes së bujshme dhe shokuese që “Los Blancos” pësuan mbrëmë ndaj Albacetes në kuadër të Copa del Rey.

Madrilenët u eliminuan pas minutave shtesë, duke u mposhtur 3:2 nga skuadra e divizionit të dytë spanjoll, e cila regjistroi një nga fitoret më të mëdha në historinë e saj.

Ndeshja, e zhvilluar në një atmosferë të zjarrtë, përfundoi me zhgënjim të madh për Real Madridin, i cili nuk arriti të përballojë presionin dhe vendosmërinë e Albacetes.

Goli vendimtar në kohën shtesë vulosi eliminimin e hershëm të “Mbretërve” nga gara, duke shkaktuar reagime të shumta në opinionin sportiv.

Pas përfundimit të takimit, Arbeloa doli para mediave dhe mori plotësisht përgjegjësinë për rezultatin negativ.

Ai e cilësoi humbjen si shumë të dhimbshme dhe të papranueshme për një klub me peshën dhe historinë e Real Madridit.

“Në këtë klub, edhe një barazim konsiderohet rezultat i keq — imagjinoni një humbje si kjo. Është shumë e dhimbshme dhe na dhemb të gjithëve, veçanërisht kur ndodh kundër një skuadre që garon në një kategori më të ulët,” deklaroi Arbeloa.

Trajneri spanjoll theksoi se vendimet taktike dhe përbërja e skuadrës ishin përgjegjësi e tij, duke mos kërkuar justifikime.

“Nëse dikush është përgjegjës dhe fajtor për këtë rezultat, jam unë. Unë i kam marrë vendimet për formacionin, mënyrën se si donim të luanim dhe ndryshimet gjatë ndeshjes,” shtoi ai.

Megjithatë, Arbeloa pati fjalë pozitive për futbollistët e tij, duke i falënderuar për angazhimin dhe përpjekjen e treguar në fushë.

“Mund vetëm t’i falënderoj lojtarët për mënyrën se si më mirëpritën dhe për përkushtimin që treguan, pavarësisht rezultatit,” përfundoi trajneri i Real Madridit.

Kjo humbje pritet të rrisë presionin mbi Arbeloan dhe skuadrën, ndërsa Real Madridi tashmë duhet të përqendrohet në garat e tjera të sezonit./AutoPortali