Real Madridi ka nisur tashmë planifikimin për sezonin e ardhshëm dhe në qendër të strategjisë së tij është forcimi i repartit të mbrojtjes.
Një emër është rrethuar me të kuqe në listën e drejtuesve madrilenë: Willian Pacho, klubi spanjoll është i gatshëm të ofrojë deri në 100 milionë euro për qendërmbrojtësin 24-vjeçar të Paris Saint-Germain, në atë që shihet si një investim afatmesëm.
Në afatin aktual të transferimeve nuk pritet një shpenzim i madh, por fokusi është te përgatitja e një lëvizjeje të rëndësishme për verën e ardhshme, me synimin për të përforcuar një mbrojtje që po shkakton shqetësime të brendshme në klub.
Brenda zyrave të “Los Blancos” ekziston bindja se mbrojtja ka nevojë për një lider të ri dhe të vendosur.
Profili i Willian Pachos përputhet plotësisht me këtë ide, duke marrë parasysh moshën e tij, paraqitjet e qëndrueshme dhe potencialin e madh për rritje.
Pavarësisht pasigurisë që rrethon të ardhmen e Alvaro Arbeloas dhe dilemat për trajnerin e ardhshëm, Real Madridi po vazhdon planifikimin pa u ndikuar nga këto faktorë.
Objektivi është të sigurohet një nënshkrim strategjik, pavarësisht se kush do të jetë në stolin madrilen.
Në Madrid vlerësohen lart forca e tij fizike, shpejtësia dhe aftësia për të përballuar presionin në ambiente shumë kërkuese, siç është Paris Saint-Germain.
Në moshën 24-vjeçare, mbrojtësi ekuadorian është konsoliduar si një nga lojtarët më të kërkuar në Evropë në pozicionin e tij.
Pikërisht këto paraqitje e justifikojnë gatishmërinë e Real Madridit për të ofruar shifrën e lartë prej 100 milionë eurosh.
Nga ana tjetër, Paris Saint-Germain është plotësisht i vetëdijshëm për vlerën e lojtarit të tij.
Edhe pse klubi francez nuk ka ndërmend ta shesë, një ofertë e tillë do ta detyronte çdo drejtues të ulej në tryezën e negociatave.
Në Paris e dinë se Real Madridi zakonisht nuk bën oferta të kësaj madhësie pa bindje të plotë.
PSG do të duhet të vendosë mes aspektit sportiv dhe mundësisë për një shitje historike të një prej shtyllave kryesore të mbrojtjes.
Sipas planit aktual, Real Madridi synon ta finalizojë operacionin gjatë verës së ardhshme.
Klubi beson se ky nuk është momenti i duhur për një investim të madh, por për të avancuar analizat dhe diskutimet e brendshme./AutoPortali
