Koha më e shpejtë e ditës së tretë të testeve në Barcelonë u shënua nga Andrea Kimi Antonelli, me 1:17.362. Piloti 19-vjeçar italian i Mercedesit e realizoi kohën pasdite me goma të buta, pasi mori timonin e W17 nga George Russell, të cilin e la pas me 0.180 sekonda.

Pas kësaj, Antonelli vazhdoi punën me goma “hard”, ndërsa Mercedes konfirmoi formë shumë të mirë dhe besueshmëri, me 92 xhiro të përshkuara nga Russell. Dita shënoi edhe debutimin e McLaren MCL40 me kampionin në fuqi Lando Norris, i cili, megjithë një program të kufizuar, e mbylli ditën i treti me 1:18.725.

Te Alpine, pasdite makina kaloi nga Franco Colapinto te Pierre Gasly. Arvid Lindblad (Racing Bulls) shkaktoi një flamur të kuq për shkak të një problemi mekanik. Më herët u ndalën edhe Oliver Bearman me Haas VF-26 dhe Nico Hulkenberg me Audi, i cili e mbylli i fundit ditën.

Ferrari dhe Red Bull rikthehen në pistë të enjten, ndërsa pritet edhe debutimi i Aston Martin AMR26 me motor Honda, e drejtuar nga Adrian Newey, me shumë gjasa vetëm në sesionin e pasdites.