Qeveria e Australisë së Jugut ka paraqitur një propozim tek MotoGP Sports Entertainment për të organizuar atë që do të ishte gara e parë plotësisht rrugore në historinë e kampionatit, pasi të përfundojë kontrata aktuale me Phillip Island në vitin 2026.

Kjo lëvizje vjen pasi qeveria e Victorias refuzoi zhvendosjen e Çmimit të Madh të Australisë nga Phillip Island në Albert Park Circuit, duke premtuar në të njëjtën kohë investime për përmirësimin e pistës ekzistuese. Megjithatë, sipas burimeve, kjo kundër-ofertë nuk ka bindur drejtuesit e kampionatit dhe gara e tetorit pritet të jetë e fundit në pistën ikonike.

Sipas Motorsport.com, projekti i Australisë së Jugut parashikon zhvillimin e një piste rrugore në Adelaide. Drejtori sportiv i MotoGP, Carlos Ezpeleta, ka vizituar qytetin së fundmi dhe një njoftim zyrtar mund të vijë shumë shpejt.

Nëse arrihet marrëveshja, gara e re do të hynte në fuqi nga viti 2027, pas përfundimit të punimeve të nevojshme. Adelaide ka pritur më parë Çmimin e Madh të Australisë në Formula 1 nga viti 1985 deri në 1995.