CEO i Ducati, Claudio Domenicali, beson se rregulloret e reja teknike të MotoGP për vitin 2027 synojnë të thjeshtojnë kampionatin dhe të pengojnë Ducati-n të fitojë avantazh përmes inovacioneve të reja.

Sezoni 2026 është i fundit me rregullat aktuale, një periudhë ku Ducati ka dominuar, duke fituar katër tituj pilotësh (dy me Francesco Bagnaia, një me Jorge Martin dhe një me Marc Marquez) si dhe gjashtë tituj radhazi konstruktorësh.

Nga viti 2027 do të hyjnë në fuqi ndryshime të mëdha: kapaciteti i motorit do të ulet nga 1000cc në 850cc, do të kufizohen më tej elementët aerodinamikë dhe do të hiqen sistemet e rregullimit të lartësisë së motorit, fusha ku Ducati ka qenë pioniere.

Domenicali theksoi se objektivi kryesor mbetet “të gjejmë formulën për të fituar edhe në 2027”, por pranoi se ekziston një shtysë për ta thjeshtuar rregulloren “që Ducati të mos shpikë diçka të çuditshme”.

Ai kujtoi se Ducati kishte eksperimentuar herët me sisteme të ngjashme, si rregullimi i pasmë i ndryshueshëm që në vitin 2001 në Superbike, si dhe me krahë aerodinamikë që në 2008.

Megjithatë, ai shprehu besim te ekipi teknik i drejtuar nga Gigi Dall’Igna dhe Davide Barana, duke shtuar se megjithëse motorët e rinj do të jenë më të thjeshtë dhe me më pak mundësi zhvillimi, Ducati do të përpiqet të gjejë sërish një avantazh brenda kufijve të rregullores.