Kampionati Botëror i Rally-t (WRC) i dha lamtumirën një prej makinave më spektakolare të epokës moderne. Pas Rally Japan, versionet për asfalt të makinave Rally1 hynë në histori, ndërsa nga sezoni i ardhshëm do të hyjnë në fuqi rregullore të reja që synojnë uljen e kostove dhe rritjen e numrit të konkurrentëve. Si pasojë, makinat e reja do të jenë më pak të fuqishme dhe më të ngadalta se Rally1-t aktuale.

Pilotët dhe ekipet e kanë pranuar se këto makina do t’u mungojnë. Piloti i Hyundai-t, Adrien Fourmaux, i përshkroi si të jashtëzakonshme në asfalt, ndërsa nëntë herë kampioni i botës Sébastien Ogier tha se ato kanë qenë ndër makinat më të mira që ka drejtuar në karrierën e tij.

Makina si Toyota GR Yaris Rally1, Hyundai i20 N Rally1 dhe Ford Puma Rally1 konsiderohen si disa nga automjetet më agresive dhe mbresëlënëse që ka parë ndonjëherë WRC. Në versionin e tyre fillestar, me sistem hibrid, ato prodhonin rreth 500 kuaj fuqi dhe ofronin përshpejtim, frenim dhe manovrim në nivel të jashtëzakonshëm.

Sipas drejtuesit të ekipit M-Sport Ford, Richard Millener, Rally1 përfaqëson versionin modern të legjendarëve të Grupit B të viteve 1980. Ai theksoi se do të jetë për të ardhur keq që këto makina po largohen, por sporti duhet të ecë përpara drejt një epoke të re.

Megjithatë, shumë tifozë besojnë se rregulloret e reja mund të sjellin më shumë prodhues, gara më të forta dhe konkurrencë më të ngushtë, edhe pse spektakli dhe shpejtësia e Rally1-ve do të jetë e vështirë të zëvendësohen.