Sebastien Ogier ka ringjallur ëndrrën për një titull të 10-të rekord në Kampionatin Botëror të Rally-t (WRC), pasi triumfoi në Rally Acropolis të Greqisë me një fundjavë perfekte. Francezi fitoi garën, “Power Stage” dhe “Super Sunday”, duke marrë maksimumin prej 35 pikësh dhe duke u rikthyer fuqishëm në luftën për titull.

Nëntë herë kampioni i botës zhvilloi një duel spektakolar me Thierry Neuville gjatë gjithë fundjavës. Dy pilotët ishin të ndarë me vetëm pak sekonda në pjesën më të madhe të garës, ndërsa fituesi u vendos vetëm në etapat e fundit. Fati buzëqeshi këtë herë Ogierit, pasi Neuville pësoi dy shpime gomash në etapën e parafundit dhe humbi çdo mundësi për fitore.

Fitorja në Greqi mund të rezultojë vendimtare për sezonin e 42-vjeçarit, i cili garon me një program të pjesshëm me Toyota. Ogier pranoi se nëse nuk do të fitonte në Acropolis, shpresat për titull do të zbeheshin ndjeshëm. Tani ai është vetëm 37 pikë pas liderit të kampionatit, shokut të skuadrës Elfyn Evans, duke e bërë garën për titull sërish plotësisht të hapur.

Me disa gara ende për t’u zhvilluar, triumfi në Greqi ka rihapur plotësisht betejën për titullin botëror, ndërsa Ogier është më pranë se kurrë mundësisë për të vendosur një rekord historik me trofeun e 10-të në WRC.