Ish-piloti i Formula 1, Ralf Schumacher, do t’i nënshtrohet një ndërhyrjeje kirurgjikale pas një incidenti me jet-ski. Megjithatë, gjermani pret të jetë i pranishëm në Monza për Çmimin e Madh të Italisë këtë fundjavë.

Incidenti ndodhi gjatë një eventi televiziv live – Kampionatit Botëror të jet-skive për personazhe të njohura, organizuar nga Stefan Raab në Duisburg.

Në garën individuale, Schumacher arriti deri në finale, por nuk ia doli të fitonte. Më pas, vëmendja u zhvendos te gara ekipore.

Schumacher garoi së bashku me prezantuesin Raab, por gjërat nuk shkuan sipas planit. Të dy u përmbysën pranë një prej bovave dhe ranë në ujë.

Pak çaste më vonë, jet-ski u përmbys sërish, pasi Schumacher u nis papritur, përpara se Raab të arrinte të hipte plotësisht.

Kur Schumacher tentoi të hipte përsëri në jet-ski, u bë e qartë se kishte dhimbje. Më vonë ai shpjegoi për RTL: “Shpatulla më doli nga vendi kur u përpoqa ta ktheja jet-skiun kaq shpejt”.

Pasi shpatulla iu vendos në vend, radiografia tregoi një frakturë të vogël, e cila do të kërkojë ndërhyrje kirurgjikale.

“Vetëm shpatulla kishte dalë nga vendi, por fatkeqësisht u shkëput edhe një copëz kocke. Operacioni duhet të përfundojë shpejt dhe më pas duhet të jem përsëri në Monza. Thjesht do të më duhet ta mbaj mikrofonin me dorën e majtë!”