Nëntë herë kampioni i botës kërkoi falje ndaj presidentit të Paraguait, Santiago Peña, pasi pranoi se ngriti shqetësimet e tij për WRC-në në momentin e gabuar dhe me tonin e gabuar.

Sebastien Ogier i ka kërkuar publikisht falje presidentit të FIA-s, Mohammed Ben Sulayem, dhe presidentit të Paraguait, Santiago Pena, për një “ndërveprim të papërshtatshëm” gjatë Rally Paraguay.

Kampioni në fuqi i botës në rally publikoi një deklaratë në rrjetet sociale lidhur me një incident të së shtunës, gjatë të cilit ai shprehu shqetësimet e tij për Kampionatin Botëror të Rally-t (WRC). Ben Sulayem ndodhej në Rally Paraguay për një konferencë për shtyp, ku prezantoi kompanitë e reja që do të menaxhojnë të drejtat komerciale të WRC-së.

Nuk është e qartë saktësisht se çfarë i tha Ogier Ben Sulayem dhe Pena-s. Megjithatë, piloti i Toyota-s kishte qenë kritik ndaj furnizuesit të gomave të WRC-së, Hankook, pas disa defekteve të gomave të premten.

Ogier pësoi dy shpime të gomave të premten dhe më pas u detyrua të tërhiqej nga gara për atë ditë, pasi pësoi dëmtime në pezullimin e përparmë pas etapës së tretë. Piloti i Toyota-s i cilësoi gomat si “jo në standardin e një kampionati botëror”, ndërsa për Motorsport.com deklaroi se “është thjesht një llotari” dhe se situata ishte “larg së qenit e pranueshme”.

Disa orë pas përfundimit të Rally Paraguay, Ogier publikoi një deklaratë ku konfirmoi se të shtunën në mbrëmje u kishte kërkuar personalisht falje të dy presidentëve. Më pas, ai zhvilloi një takim konstruktiv me Ben Sulayem për të diskutuar shqetësimet e tij lidhur me WRC-në.

“Pas një Rally del Paraguay mjaft të ngarkuar, por shumë mirë të organizuar, dua të shfrytëzoj këtë mundësi për t’u kërkuar publikisht falje presidentit të FIA-s, Mohammed Ben Sulayem, dhe presidentit të Paraguait, Santiago Pena, për ndërveprimin e papërshtatshëm të djeshëm pasdite,” shkroi Ogier.

“Nuk ishte as momenti i duhur dhe as toni i duhur për të ngritur shqetësimet e mia për kampionatin”.

“Mbrëmë pata mundësinë t’u kërkoja personalisht falje të dy presidentëve, pasuar nga një takim shumë konstruktiv”.

“Në fakt, ishte një moment i shkëlqyer për të biseduar me presidentin e FIA-s, Ben Sulayem, dhe për të diskutuar disa fusha që të gjithë e dimë se kanë nevojë për vëmendje dhe përmirësim në sportin tonë”.

“Së bashku, vendosëm disa objektiva të qarta dhe mezi pres t’i shoh ato të zbatohen për një të ardhme më të mirë të rally-t”.